ഇന്ത്യയിൽ വൻ നിക്ഷേപത്തിനൊരുങ്ങി ദക്ഷിണ കൊറിയൻ വാഹന നിർമാതാക്കളായ ഹ്യുണ്ടായ് മോട്ടോർ ഗ്രൂപ്പ്. 2032 വരെ ഇന്ത്യയിൽ 15.5 ബില്യൻ ഡോളർ (ഏകദേശം 1.5 ലക്ഷം കോടി രൂപ) നിക്ഷേപിക്കുമെന്നാണ് കമ്പനിയുടെ പ്രഖ്യാപനം. പ്രധാനമന്ത്രി നരേന്ദ്ര മോദിയും ഹ്യുണ്ടായ് മോട്ടോർ ഗ്രൂപ്പ് എക്സിക്യൂട്ടീവ് ചെയർമാൻ യൂസുൻ ചുങ്ങും പ്രധാനമന്ത്രിയുടെ ഓഫീസിൽ നടത്തിയ കൂടിക്കാഴ്ചയ്ക്കു പിന്നാലെയാണ് പ്രഖ്യാപനം.
ഹ്യുണ്ടായിയുടെ ആഗോള ബിസിനസിൽ ഇന്ത്യയ്ക്ക് നിർണായക സ്ഥാനമുണ്ടെന്നും രാജ്യത്തെ തന്ത്രപ്രധാന വിപണിയായാണ് കമ്പനി കാണുന്നതെന്നും യൂസുൻ ചുങ് വ്യക്തമാക്കി. ഇന്ത്യയിലെ പ്രവർത്തനങ്ങൾ കൂടുതൽ വിപുലീകരിക്കുന്നതിന്റെ ഭാഗമായാണ് വൻ നിക്ഷേപ പദ്ധതി.
നിർമാണം മുതൽ ഭാവി സാങ്കേതികവിദ്യ വരെ
നിർമാണശേഷി വർധിപ്പിക്കൽ, ഗവേഷണ-വികസന അടിസ്ഥാനസൗകര്യങ്ങൾ ശക്തിപ്പെടുത്തൽ, വാഹന ഘടകങ്ങളുടെ പ്രാദേശിക ഉൽപാദനം പ്രോത്സാഹിപ്പിക്കൽ, ഭാവി സാങ്കേതികവിദ്യകളിൽ നിക്ഷേപം നടത്തൽ തുടങ്ങിയ മേഖലകളിലായിരിക്കും തുക വിനിയോഗിക്കുക. പ്രാദേശിക വിതരണക്കാരുടെ പങ്കാളിത്തം വർധിപ്പിക്കുന്നതിനും പദ്ധതി ലക്ഷ്യമിടുന്നു.നിക്ഷേപ പദ്ധതി നടപ്പാക്കുന്നതിനായി ഇന്ത്യയിൽ പ്രത്യേക നിക്ഷേപ സ്ഥാപനം രൂപീകരിക്കുമെന്നും ഹ്യുണ്ടായ് ഗ്രൂപ്പ് അറിയിച്ചിട്ടുണ്ട്. പുതിയ നിക്ഷേപം രാജ്യത്തെ വാഹന നിർമാണ മേഖലയ്ക്കും അനുബന്ധ വ്യവസായങ്ങൾക്കും കൂടുതൽ അവസരങ്ങൾ സൃഷ്ടിക്കുമെന്നാണ് പ്രതീക്ഷ.
റെക്കോർഡ് വിൽപനയുമായി ഇന്ത്യൻ വാഹന വിപണി
ഇന്ത്യൻ വാഹന വിപണിയിലെ വളർച്ചയും ആഗോള വാഹന നിർമാതാക്കളുടെ നിക്ഷേപ താൽപര്യം വർധിപ്പിക്കുന്ന ഘടകമാണ്. ഓഗസ്റ്റിൽ രാജ്യത്ത് 4.39 ലക്ഷം പുതിയ കാറുകൾ വിറ്റഴിഞ്ഞതായും വാർഷികാടിസ്ഥാനത്തിൽ 36 ശതമാനം വളർച്ച രേഖപ്പെടുത്തിയതായും റിപ്പോർട്ടിൽ പറയുന്നു.
സൊസൈറ്റി ഓഫ് ഇന്ത്യൻ ഓട്ടോമൊബൈൽ മാനുഫാക്ചറേഴ്സിന്റെ (സിയാം) കണക്കുകൾ പ്രകാരം ഇന്ത്യയിൽ ഏറ്റവും കൂടുതൽ കാറുകൾ വിൽക്കുന്ന കമ്പനി മാരുതി സുസുക്കിയാണ്. ഏപ്രിൽ മുതൽ ഓഗസ്റ്റ് വരെയുള്ള വിൽപന കണക്കുകളിൽ മഹീന്ദ്ര ആൻഡ് മഹീന്ദ്ര രണ്ടാം സ്ഥാനത്തും ഹ്യുണ്ടായ് മൂന്നാം സ്ഥാനത്തുമാണ്.
ഇന്ത്യയിലെ ഏറ്റവും വലിയ ഐപിഒയുമായി ഹ്യുണ്ടായ്
2024ലാണ് ഹ്യുണ്ടായ് മോട്ടോർ ഇന്ത്യ പ്രാരംഭ ഓഹരി വിൽപനയിലൂടെ (ഐപിഒ) ഇന്ത്യൻ ഓഹരി വിപണിയിൽ ലിസ്റ്റ് ചെയ്തത്. അന്ന് 27,800 കോടി രൂപ സമാഹരിച്ച കമ്പനി, ഇന്ത്യയിലെ ഏറ്റവും വലിയ ഐപിഒ എന്ന റെക്കോർഡും സ്വന്തമാക്കി.പുതിയ നിക്ഷേപ പ്രഖ്യാപനത്തോടെ ഇന്ത്യൻ വിപണിയിലെ സാന്നിധ്യം കൂടുതൽ ശക്തമാക്കാനും നിർമാണ-സാങ്കേതിക മേഖലകളിൽ ദീർഘകാല വളർച്ച ഉറപ്പാക്കാനുമാണ് ഹ്യുണ്ടായ് ലക്ഷ്യമിടുന്നത്.
