രാജ്യത്ത് എഥനോൾ ഉൽപാദനം വർധിച്ചതോടെ ആഭ്യന്തര ആവശ്യത്തിന് ശേഷമുള്ള അധിക ഉൽപാദനം കയറ്റുമതി ചെയ്യാനുള്ള സാധ്യതകൾ ഇന്ത്യ പരിശോധിക്കുന്നു. പെട്രോളിൽ 10 ശതമാനം എഥനോൾ (E10) കലർത്താൻ പദ്ധതിയിടുന്ന നേപ്പാൾ ഉൾപ്പെടെയുള്ള അയൽരാജ്യങ്ങളിലേക്ക് എഥനോൾ കയറ്റി അയയ്ക്കുന്നതാണ് പ്രധാനമായും പരിഗണിക്കുന്നത്.നിലവിൽ ഇന്ത്യയിൽ ആവശ്യത്തിനേക്കാൾ കൂടുതൽ എഥനോൾ ഉൽപാദിപ്പിക്കുന്ന സാഹചര്യത്തിൽ, നേപ്പാൾ, ബംഗ്ലാദേശ്, ഇന്തോനേഷ്യ തുടങ്ങിയ രാജ്യങ്ങൾ പുതിയ വിപണികളാകുമെന്നാണ് എഥനോൾ വ്യവസായത്തിന്റെ പ്രതീക്ഷ.
ആഭ്യന്തര ആവശ്യത്തേക്കാൾ കൂടുതലാണ് ഉൽപാദനം
കേന്ദ്ര സർക്കാരിന്റെ കണക്കുകൾ പ്രകാരം ഇന്ത്യയുടെ വാർഷിക എഥനോൾ ഉൽപാദനം നിലവിൽ 2,000 കോടി ലിറ്ററാണ്. 2013-14 സാമ്പത്തിക വർഷത്തിൽ ഇത് 421 കോടി ലിറ്റർ മാത്രമായിരുന്നു. ഈ വർഷം ഉൽപാദനം 2,400 കോടി ലിറ്ററിലെത്തുമെന്നാണ് വിവിധ സാമ്പത്തിക ഏജൻസികളുടെ വിലയിരുത്തൽ.രാജ്യത്ത് പ്രതിവർഷം ഏകദേശം 1,450 കോടി ലിറ്റർ എഥനോൾ മാത്രമാണ് ആവശ്യമായത്.1,100 കോടി ലിറ്റർ പെട്രോളിൽ കലർത്തുന്നതിനായി എണ്ണക്കമ്പനികൾ വാങ്ങുന്നു.350 കോടി ലിറ്റർ മദ്യം, മരുന്ന്, രാസവസ്തു നിർമാണം തുടങ്ങിയ വ്യവസായങ്ങൾ ഉപയോഗിക്കുന്നു.
ഇതോടെ പ്രതിവർഷം ഏകദേശം 700 കോടി ലിറ്റർ എഥനോൾ അധികമായി ശേഷിക്കുന്ന സാഹചര്യമാണുള്ളത്. ആവശ്യക്കാർ കുറവായതിനാൽ പല എഥനോൾ നിർമാണശാലകളും അവരുടെ സ്ഥാപിത ശേഷിയുടെ ഏകദേശം 60 ശതമാനം മാത്രമാണ് ഉപയോഗപ്പെടുത്തുന്നതെന്ന് വ്യവസായ വിദഗ്ധർ ചൂണ്ടിക്കാട്ടുന്നു.
നേപ്പാൾ E10 ഇന്ധനത്തിലേക്ക്
ഇതിനിടെ, അയൽരാജ്യമായ നേപ്പാൾ രാജ്യത്ത് E10 പെട്രോൾ അവതരിപ്പിക്കാനുള്ള നടപടികൾ വേഗത്തിലാക്കിയിട്ടുണ്ട്.എഥനോൾ നിർമാണം, ഗുണനിലവാരം, സംഭരണം എന്നിവ സംബന്ധിച്ച കരട് മാനദണ്ഡങ്ങൾ നേപ്പാളിലെ ബ്യൂറോ ഓഫ് സ്റ്റാൻഡേർഡ്സ് പുറത്തിറക്കിയിട്ടുണ്ട്. പദ്ധതി നടപ്പാക്കുന്നതിന് മുമ്പ് പൊതുജനങ്ങൾ, സാങ്കേതിക വിദഗ്ധർ, വ്യവസായ പ്രതിനിധികൾ എന്നിവരിൽ നിന്ന് അഭിപ്രായം തേടുകയും ചെയ്യുന്നു.രാജ്യത്ത് വിൽക്കുന്ന പെട്രോളിൽ 10 ശതമാനം എഥനോൾ കലർത്താൻ നേപ്പാൾ മന്ത്രിസഭ നേരത്തേ തീരുമാനിച്ചിട്ടുണ്ട്. ആവശ്യാനുസരണം ഈ ശതമാനത്തിൽ ഭാവിയിൽ മാറ്റം വരുത്താനാകുമെന്നും സർക്കാർ വ്യക്തമാക്കിയിട്ടുണ്ട്.കരട് മാനദണ്ഡങ്ങളിൽ, വാഹനങ്ങളുടെ എൻജിനെ ദോഷകരമായി ബാധിക്കാവുന്ന മെഥനോൾ, ടർപന്റൈൻ, കീട്ടോണുകൾ തുടങ്ങിയ വസ്തുക്കൾ എഥനോൾ നിർമാണത്തിൽ ഉപയോഗിക്കരുതെന്നും നിർദേശിച്ചിട്ടുണ്ട്.
കയറ്റുമതി വിപണി വികസിപ്പിക്കാനുള്ള ശ്രമം
ഇന്ത്യയിൽ എഥനോൾ ഉൽപാദനം തുടർച്ചയായി വർധിക്കുന്ന സാഹചര്യത്തിൽ, ആഭ്യന്തര ആവശ്യത്തിന് ശേഷമുള്ള അധിക ഉൽപാദനം കയറ്റുമതി ചെയ്യുന്നതിനുള്ള പുതിയ വിപണികൾ കണ്ടെത്തുക എന്നതാണ് വ്യവസായത്തിന്റെ ലക്ഷ്യം. E10 ഇന്ധന നയം നടപ്പാക്കാൻ ഒരുങ്ങുന്ന അയൽരാജ്യങ്ങൾ ഇതിന് പ്രധാന അവസരമായി കണക്കാക്കപ്പെടുന്നു.അതേസമയം, ഇന്ത്യയിൽ E20 പെട്രോൾ ഉപയോഗവുമായി ബന്ധപ്പെട്ട ചർച്ചകളും വിവിധ ഉപഭോക്തൃ ആശങ്കകളും തുടരുന്നതിനിടെയാണ് അധിക എഥനോളിന് വിദേശ വിപണി കണ്ടെത്താനുള്ള ശ്രമങ്ങൾ ശക്തമാകുന്നത്.
