കേരളത്തിലെ ഇ-കൊമേഴ്സ് ഇടപാടുകൾക്ക് വിറ്റുവരവിന്റെ പരിധിയില്ലാതെ ഇ-ഇൻവോയ്സ് നിർബന്ധമാക്കണമെന്ന ആവശ്യവുമായി സംസ്ഥാന സർക്കാർ. ജിഎസ്ടി കൗൺസിലിൽ മുഖ്യമന്ത്രി വി.ഡി. സതീശനാണ് നിർണായക നിർദേശം മുന്നോട്ടുവച്ചത്. സംസ്ഥാനത്തിന് അർഹമായ സംയോജിത ചരക്ക് സേവന നികുതി (ഐജിഎസ്ടി) വിഹിതം കൃത്യമായി ലഭിക്കുന്നുവെന്ന് ഉറപ്പാക്കുകയാണ് ലക്ഷ്യം.നിലവിൽ വാർഷിക വിറ്റുവരവ് അഞ്ച് കോടി രൂപയ്ക്ക് മുകളിലുള്ള സ്ഥാപനങ്ങൾക്കാണ് ഇ-ഇൻവോയ്സ് നിർബന്ധം. ഇ-കൊമേഴ്സ് ഓപ്പറേറ്റർമാർക്ക് ഈ പരിധി ഒഴിവാക്കി എല്ലാ ഇടപാടുകൾക്കും ഇ-ഇൻവോയ്സ് നിർബന്ധമാക്കണമെന്നാണ് കേരളത്തിന്റെ ആവശ്യം. ഓൺലൈൻ വ്യാപാരം വർധിക്കുന്ന സാഹചര്യത്തിൽ സംസ്ഥാനത്തിന് അർഹമായ നികുതിവിഹിതം ഉറപ്പാക്കാൻ ഈ മാറ്റം സഹായിക്കുമെന്നാണ് സർക്കാർ പ്രതീക്ഷിക്കുന്നത്.
ഐജിഎസ്ടി വിഹിതത്തിൽ ചോർച്ചയെന്ന് പരാതി
ഇ-കൊമേഴ്സ് ഓപ്പറേറ്റർമാർ ജിഎസ്ടി റിട്ടേൺ സമർപ്പിക്കുമ്പോൾ പോർട്ടലിലെ ഡ്രോപ്പ്ഡൗൺ മെനുവിൽനിന്നാണ് ഉപഭോക്താവിന്റെ സംസ്ഥാനം തിരഞ്ഞെടുക്കുന്നത്. ഈ പട്ടികയിൽ കേരളം 32-ാം സ്ഥാനത്താണെന്നാണ് റിപ്പോർട്ട്. ചില സന്ദർഭങ്ങളിൽ സംസ്ഥാനം തെറ്റായി തിരഞ്ഞെടുക്കപ്പെടുന്നത് കേരളത്തിന് ലഭിക്കേണ്ട ഐജിഎസ്ടി വിഹിതം മറ്റ് സംസ്ഥാനങ്ങളിലേക്ക് പോകാൻ കാരണമാകുന്നുവെന്നാണ് കേരളത്തിന്റെ പരാതി.
ഇത്തരത്തിലുള്ള പിഴവുകളും മറ്റ് രീതികളിലുള്ള ഐജിഎസ്ടി ചോർച്ചയും തടയാൻ നിലവിൽ കാര്യക്ഷമമായ സംവിധാനമില്ലെന്നാണ് സംസ്ഥാന ജിഎസ്ടി വകുപ്പിന്റെ വിലയിരുത്തൽ. ഇതുമൂലം കേരളത്തിന് പ്രതിവർഷം ശരാശരി 5,000 കോടി രൂപയെങ്കിലും നഷ്ടമുണ്ടാകുന്നുണ്ടെന്നാണ് കണക്ക്.
38,000 കോടി രൂപയുടെ ഓൺലൈൻ വിപണി
കേരളത്തിലെ വാർഷിക ഓൺലൈൻ പർച്ചേസ് മൂല്യം 30,000 കോടി മുതൽ 38,000 കോടി രൂപ വരെയാണെന്നാണ് കണക്ക്. രാജ്യത്തെ ഇ-കൊമേഴ്സ് വിൽപനയുടെ 3.5 മുതൽ 4.2 ശതമാനം വരെ കേരളത്തിൽ നിന്നാണെന്നും റിപ്പോർട്ടിൽ പറയുന്നു. സംസ്ഥാനത്തിന്റെ ജനസംഖ്യാ വിഹിതം ഏകദേശം 2.5 ശതമാനം മാത്രമാണെന്നത് പരിഗണിക്കുമ്പോൾ ഓൺലൈൻ വ്യാപാരത്തിൽ കേരളത്തിനുള്ള പങ്ക് ശ്രദ്ധേയമാണ്.
എന്നാൽ, വലിയ ഉപഭോക്തൃ വിപണിയായിട്ടും അർഹമായ നികുതിവിഹിതം ഉറപ്പാക്കുന്നതിൽ സംസ്ഥാനത്തിന് വെല്ലുവിളികളുണ്ടെന്നാണ് സർക്കാർ ചൂണ്ടിക്കാട്ടുന്നത്. കഴിഞ്ഞ മാർച്ച് വരെയുള്ള കണക്കനുസരിച്ച് കേരളത്തിന്റെ ജിഎസ്ടി വളർച്ചാനിരക്ക് ശരാശരി രണ്ട് ശതമാനം മാത്രമാണെന്നും റിപ്പോർട്ടിൽ പറയുന്നു.
ഇ-ഇൻവോയ്സ് നിർബന്ധമാക്കിയാൽ എന്ത് മാറ്റം?
എല്ലാ ഇ-കൊമേഴ്സ് ഓപ്പറേറ്റർമാർക്കും വിറ്റുവരവിന്റെ പരിധിയില്ലാതെ ഇ-ഇൻവോയ്സ് നിർബന്ധമാക്കിയാൽ ഓരോ വിൽപനയുടെയും വിതരണസ്ഥലം ഇൻവോയ്സ് സൃഷ്ടിക്കുന്ന സമയത്തുതന്നെ രേഖപ്പെടുത്താനാകും. ഇതുവഴി ഉപഭോഗം നടക്കുന്ന സംസ്ഥാനത്തെ കൃത്യമായി തിരിച്ചറിയാനും അതിനനുസരിച്ച് ഐജിഎസ്ടി വിഹിതം അനുവദിക്കാനും കഴിയുമെന്നാണ് കേരളത്തിന്റെ വാദം.നിർദേശം അംഗീകരിക്കപ്പെട്ടാൽ ഓൺലൈൻ വ്യാപാരത്തിലൂടെയുള്ള നികുതി വരുമാനം കൂടുതൽ കൃത്യമായി കണക്കാക്കാനും സംസ്ഥാനത്തിന് അർഹമായ വിഹിതം ഉറപ്പാക്കാനും സാധിക്കുമെന്നാണ് സർക്കാരിന്റെ പ്രതീക്ഷ. ജിഎസ്ടി കൗൺസിലിന്റെ പരിഗണനയിൽ വരുന്ന ഈ നിർദേശത്തിന്റെ തുടർനടപടികൾ കേരളത്തിന്റെ നികുതി വരുമാനത്തെ സംബന്ധിച്ച് നിർണായകമാകും.
