കേരളത്തിലെ പ്രധാന എയർ കാർഗോ ഹബ്ബായി വളരാൻ ഒരുങ്ങി കൊച്ചി അന്താരാഷ്ട്ര വിമാനത്താവളം. ഇതിന്റെ ഭാഗമായി ദുബായ് ആസ്ഥാനമായ ഫ്ലൈ ദുബായ് ഒക്ടോബർ 25 മുതൽ കൊച്ചിയിലേക്ക് കാർഗോ സർവീസ് ആരംഭിക്കും. ആദ്യഘട്ടത്തിൽ ആഴ്ചയിൽ ഒരു സർവീസ് വീതമാണ് നടത്തുക.ദുബായ്–കൊച്ചി–ദുബായ് റൂട്ടിൽ ബോയിങ് 737 ഫ്രൈറ്റർ വിമാനമാണ് സർവീസിന് ഉപയോഗിക്കുന്നത്. അടുത്തിടെയാണ് ഫ്ലൈ ദുബായ് കാർഗോ രംഗത്തേക്ക് പ്രവേശിച്ചത്. സോളിറ്റ് എയറിൽനിന്ന് പാട്ടത്തിനെടുത്ത മൂന്ന് കാർഗോ വിമാനങ്ങളാണ് കമ്പനി നിലവിൽ സർവീസിന് ഉപയോഗിക്കുന്നത്. ഓരോ വിമാനത്തിനും 23 ടൺ വരെ ചരക്ക് വഹിക്കാനാകും.
കൊച്ചിയിൽ കാർഗോ സർവീസ് നടത്തുന്ന മൂന്നാമത്തെ കമ്പനി
ഫ്ലൈ ദുബായ് കൂടി എത്തുന്നതോടെ കൊച്ചി വിമാനത്താവളത്തിൽ കാർഗോ സർവീസ് നടത്തുന്ന വിമാനക്കമ്പനികളുടെ എണ്ണം വർധിക്കും. ഇൻഡിഗോയും നാഷനൽ എയർലൈൻസും നിലവിൽ കൊച്ചിയിൽനിന്ന് കാർഗോ സർവീസുകൾ നടത്തുന്നുണ്ട്. ഇവയ്ക്കു പിന്നാലെയാണ് ഫ്ലൈ ദുബായ് ഈ മേഖലയിലേക്ക് എത്തുന്നത്.പുതിയ സർവീസ് കേരളത്തിൽനിന്നുള്ള ചരക്കുകൾ വിദേശ വിപണികളിലേക്ക് എത്തിക്കുന്നതിനും ദുബായ് വഴിയുള്ള ചരക്കുനീക്കം സുഗമമാക്കുന്നതിനും സഹായകമാകുമെന്നാണ് പ്രതീക്ഷ.
കാർഗോ കൈകാര്യം ചെയ്യാനുള്ള ശേഷി വർധിച്ചു
കാർഗോ ടെർമിനലുകളുടെ വികസനം പൂർത്തിയായതോടെ കൊച്ചി വിമാനത്താവളത്തിന്റെ ചരക്കുനീക്ക ശേഷിയിലും വർധനയുണ്ടായി. നിലവിൽ ഇറക്കുമതി വിഭാഗത്തിന് പ്രതിവർഷം ഒരു ലക്ഷം മെട്രിക് ടൺ കാർഗോയും കയറ്റുമതി വിഭാഗത്തിന് 1.25 ലക്ഷം മെട്രിക് ടൺ കാർഗോയും കൈകാര്യം ചെയ്യാൻ ശേഷിയുണ്ട്.
കഴിഞ്ഞ സാമ്പത്തിക വർഷം കൊച്ചി വിമാനത്താവളം വഴി 72,178 ടൺ കാർഗോയാണ് കൈകാര്യം ചെയ്തത്. കേരളത്തിൽനിന്നുള്ള മൊത്തം വിമാന കാർഗോയുടെ ഏകദേശം 60 ശതമാനവും കൊച്ചി വഴിയാണ് കൈകാര്യം ചെയ്യുന്നത്.
കയറ്റുമതി മേഖലയ്ക്ക് പുതിയ സാധ്യതകൾ
കാർഗോ സർവീസുകളുടെ എണ്ണം വർധിക്കുന്നത് കേരളത്തിലെ കയറ്റുമതിക്കാർക്കും വ്യാപാര മേഖലയ്ക്കും പുതിയ സാധ്യതകൾ തുറക്കും. മത്സ്യം, പഴം, പച്ചക്കറി തുടങ്ങിയ വേഗത്തിൽ കേടാകുന്ന ഉൽപന്നങ്ങൾ ഉൾപ്പെടെയുള്ള ചരക്കുകൾ സമയബന്ധിതമായി വിദേശ വിപണികളിലെത്തിക്കാൻ വിമാന കാർഗോ സർവീസുകൾ നിർണായകമാണ്.കാർഗോ ടെർമിനലുകളുടെ ശേഷി വർധിപ്പിച്ചതിനൊപ്പം കൂടുതൽ വിമാനക്കമ്പനികൾ സർവീസ് ആരംഭിക്കുന്നത് കൊച്ചി വിമാനത്താവളത്തിന്റെ പ്രാധാന്യം ഉയർത്തും. പുതിയ സർവീസുകളിലൂടെ കേരളത്തിന്റെ അന്താരാഷ്ട്ര ചരക്കുനീക്ക ശൃംഖല കൂടുതൽ ശക്തിപ്പെടുത്താനാകുമെന്നാണ് പ്രതീക്ഷ.
