ഇന്ത്യയുടെ ഡിജിറ്റൽ പബ്ലിക് ഇൻഫ്രാസ്ട്രക്ചറിന് ആഗോള അംഗീകാരം. ആധാറും യുപിഐയും ഉൾപ്പെടുന്ന ഇന്ത്യയുടെ ഡിജിറ്റൽ സംവിധാനം ലോകത്തിലെ ഏറ്റവും ഫലപ്രദമായ 10 ഘടനാപരമായ പരിഷ്കാരങ്ങളിൽ ഒന്നായി തിരഞ്ഞെടുക്കപ്പെട്ടു. പ്രമുഖ റേറ്റിങ് ഏജൻസിയായ കെയർഎഡ്ജ് ഗ്ലോബൽ റേറ്റിങ്സ് പുറത്തിറക്കിയ റിപ്പോർട്ടിലാണ് ഇന്ത്യയുടെ നേട്ടം വ്യക്തമാക്കുന്നത്.ലോകത്തെ 38 രാജ്യങ്ങളിലായി നടപ്പാക്കിയ 43 ഘടനാപരമായ പരിഷ്കാരങ്ങൾ വിലയിരുത്തിയ ശേഷമാണ് റിപ്പോർട്ട് തയ്യാറാക്കിയത്. ഇതിൽ ഏറ്റവും ഫലപ്രദമായ 10 പരിഷ്കാരങ്ങളെയാണ് പ്രത്യേകം തിരഞ്ഞെടുത്തത്.
130 കോടിയിലധികം ആളുകളിലേക്ക് ആധാർ
രാജ്യത്തെ ഡിജിറ്റൽ സേവനങ്ങളുടെ വ്യാപനത്തിൽ നിർണായക പങ്കുവഹിക്കുന്ന സംവിധാനമാണ് ആധാർ. ഇന്ത്യയിലെ 130 കോടിയിലധികം ആളുകളിലേക്ക്, അതായത് ജനസംഖ്യയുടെ ഏകദേശം 95 ശതമാനത്തോളം പേരിലേക്ക് ആധാർ സേവനങ്ങൾ എത്തിയിട്ടുണ്ട്. വിവിധ സർക്കാർ സേവനങ്ങളും ആനുകൂല്യങ്ങളും ലഭ്യമാക്കുന്നതിലും വ്യക്തികളെ തിരിച്ചറിയുന്നതിലും ഈ സംവിധാനം പ്രധാന പങ്കുവഹിക്കുന്നു.
യുപിഐയിൽ പ്രതിമാസം 1,300 കോടിയിലധികം ഇടപാടുകൾ
ഡിജിറ്റൽ പണമിടപാടുകളിൽ ഇന്ത്യയുടെ വളർച്ചയുടെ പ്രധാന ചാലകശക്തിയായി യുപിഐ മാറി. പ്രതിമാസം 1,300 കോടിയിലധികം ഇടപാടുകളാണ് യുപിഐ വഴി നടക്കുന്നത്. എളുപ്പത്തിലും വേഗത്തിലും പണം കൈമാറാനുള്ള സൗകര്യം ഡിജിറ്റൽ ഇടപാടുകളുടെ വ്യാപനം വർധിപ്പിച്ചു.ചെറുകിട, ഇടത്തരം സംരംഭങ്ങളുടെ 85 ശതമാനത്തിലധികം ഇടപാടുകളും ഇപ്പോൾ ഡിജിറ്റൽ സംവിധാനങ്ങളിലൂടെയാണ് നടക്കുന്നതെന്നും റിപ്പോർട്ടിൽ ചൂണ്ടിക്കാട്ടുന്നു.
സാമ്പത്തിക തടസ്സങ്ങൾ മറികടന്ന് ഡിജിറ്റൽ വിപ്ലവം
ഇന്ത്യയുടെ സാമ്പത്തിക വളർച്ചയ്ക്ക് ദീർഘകാലമായി വെല്ലുവിളിയായിരുന്ന പല തടസ്സങ്ങളും മറികടക്കാൻ ഡിജിറ്റൽ പബ്ലിക് ഇൻഫ്രാസ്ട്രക്ചർ സഹായിച്ചിട്ടുണ്ടെന്നാണ് കെയർഎഡ്ജ് ഗ്ലോബൽ റേറ്റിങ്സിന്റെ വിലയിരുത്തൽ.സർക്കാർ ഏജൻസികൾ, നിയന്ത്രണ സ്ഥാപനങ്ങൾ, ബാങ്കുകൾ, ഫിൻടെക് കമ്പനികൾ എന്നിവ തമ്മിലുള്ള സഹകരണവും ഏകോപനവുമാണ് ഈ നേട്ടത്തിന്റെ പ്രധാന ഘടകങ്ങളിലൊന്നെന്നും റിപ്പോർട്ട് വ്യക്തമാക്കുന്നു.
യൂറോപ്പിനും ഏഷ്യ-പസഫിക് മേഖലയ്ക്കും മുൻതൂക്കം
ലോകത്തെ ഏറ്റവും ഫലപ്രദമായ 10 ഘടനാപരമായ പരിഷ്കാരങ്ങളിൽ എട്ടെണ്ണവും യൂറോപ്പ്, ഏഷ്യ-പസഫിക് മേഖലകളിൽ നിന്നുള്ളവയാണ്. ഇരു മേഖലകളിൽ നിന്നും നാല് പരിഷ്കാരങ്ങൾ വീതം പട്ടികയിൽ ഇടം നേടി.
ഗ്രീസിലെ നികുതി സംവിധാനത്തിന്റെ ഡിജിറ്റലൈസേഷൻ, ജർമനിയുടെ കടനിയന്ത്രണ സംവിധാനം, സൈപ്രസിലെ ബാങ്കിങ് പരിഷ്കാരങ്ങൾ, ഫിലിപ്പീൻസിലെ പ്രോജക്ട് റിപീൽ എന്നിവയാണ് പട്ടികയിലെ മറ്റ് പ്രധാന പരിഷ്കാരങ്ങൾ.ഡിജിറ്റൽ സേവനങ്ങളുടെ വ്യാപനം, സാമ്പത്തിക ഇടപാടുകളുടെ ലളിതവൽക്കരണം, വിവിധ മേഖലകളുടെ ഏകോപനം എന്നിവയിലൂടെ ഇന്ത്യ കൈവരിച്ച മുന്നേറ്റത്തിനുള്ള ആഗോള അംഗീകാരമായാണ് ഈ നേട്ടം വിലയിരുത്തപ്പെടുന്നത്.
