വിജയ്യുടെ അഭിനയജീവിതത്തിലെ അവസാന ചിത്രമെന്ന വിശേഷണവുമായി തിയറ്ററുകളിലെത്തിയ ‘ജനനായകൻ’ ആദ്യദിനം ആഗോള ബോക്സ് ഓഫീസിൽ ശ്രദ്ധേയമായ തുടക്കമാണ് നേടിയത്. എന്നാൽ ഏറെ പ്രതീക്ഷിച്ചിരുന്ന ₹100 കോടി ക്ലബ്ബിൽ ആദ്യദിനം തന്നെ ഇടംപിടിക്കാനായില്ല.പ്രമുഖ ബോക്സ് ഓഫീസ് ട്രാക്കറായ സാക്നിൽക് പുറത്തുവിട്ട കണക്കുകൾ പ്രകാരം, ചിത്രം ആദ്യദിനം ലോകമെമ്പാടുമായി ₹80.28 കോടി ഗ്രോസ് കളക്ഷനാണ് നേടിയത്. ഇതിൽ ഇന്ത്യയിൽ നിന്നുള്ള ഗ്രോസ് കളക്ഷൻ ₹50.28 കോടിയും, വിദേശ വിപണികളിൽ നിന്ന് ₹30 കോടിയും ലഭിച്ചു.
കേരളത്തിലും ചിത്രത്തിന് മികച്ച തുടക്കമാണ് ലഭിച്ചത്. ആദ്യദിനം സംസ്ഥാനത്ത് നിന്ന് ₹5.8 കോടി ഗ്രോസ് കളക്ഷൻ നേടിയതായി റിപ്പോർട്ടുകളുണ്ട്.റിലീസിന് പിന്നാലെ ചിത്രത്തിന്റെ എച്ച്ഡി പൈറേറ്റഡ് പതിപ്പ് ഓൺലൈനിൽ വ്യാപകമായി പ്രചരിച്ചത് ബോക്സ് ഓഫീസ് പ്രകടനത്തെ പ്രതികൂലമായി ബാധിച്ച ഘടകമാണെന്നാണ് വിലയിരുത്തൽ. എന്നിരുന്നാലും, വിജയ്യുടെ അവസാന ചിത്രം എന്ന ഘടകം പ്രേക്ഷകർക്കിടയിൽ വലിയ കൗതുകം സൃഷ്ടിച്ചിട്ടുണ്ടെന്നും, സമ്മിശ്ര പ്രതികരണങ്ങൾക്കിടയിലും വാരാന്ത്യ ബുക്കിങ്ങിൽ അത് പ്രതിഫലിക്കുന്നുണ്ടെന്നും ട്രേഡ് അനലിസ്റ്റുകൾ ചൂണ്ടിക്കാട്ടുന്നു.
അഡ്വാൻസ് ബുക്കിങ്ങിലും ചിത്രം മികച്ച പ്രകടനം കാഴ്ചവെച്ചിരുന്നു. തമിഴ്നാട്ടിൽ നിന്ന് ₹7.90 കോടി, കർണാടകയിൽ നിന്ന് ₹6.03 കോടി, കേരളത്തിൽ നിന്ന് ₹1.91 കോടി എന്നിങ്ങനെയാണ് റിലീസിന് മുൻപുള്ള ബുക്കിങ് വരുമാനം.ആദ്യമായി ജനുവരി 9-ന് റിലീസ് ചെയ്യാനിരുന്ന ചിത്രം സെൻസർ നടപടികളുമായി ബന്ധപ്പെട്ട പ്രശ്നങ്ങളെ തുടർന്ന് ഏഴ് മാസത്തിലേറെ വൈകിയാണ് തിയറ്ററുകളിലെത്തിയത്. ആദ്യ വാരാന്ത്യത്തിൽ മികച്ച മുന്നേറ്റം തുടരാനായാൽ, ചിത്രത്തിന്റെ ആഗോള കളക്ഷൻ ഗണ്യമായി ഉയരുമെന്നാണ് ട്രേഡ് വൃത്തങ്ങൾ വിലയിരുത്തുന്നത്.
