ആഡംബര എസ്യുവി ലോകത്ത് പുതിയ മാനദണ്ഡങ്ങൾ സൃഷ്ടിച്ച് Range Rover Sport SVയുടെ ഏറ്റവും പുതിയ മോഡൽ ഇന്ത്യയിൽ അവതരിപ്പിച്ചു. റേഞ്ച് റോവർ സ്പോർട് ശ്രേണിയിലെ ഏറ്റവും ശക്തവും സാങ്കേതികമായി ഏറ്റവും മുന്നിട്ടുനിൽക്കുന്നതുമായ പതിപ്പായാണ് ഈ മോഡലിനെ കമ്പനി വിശേഷിപ്പിക്കുന്നത്. വാഹനത്തിന്റെ ബുക്കിംഗ് ആരംഭിച്ചുകഴിഞ്ഞു. 2026 ഓഗസ്റ്റിൽ ഡെലിവറി ആരംഭിക്കും. ഇന്ത്യൻ വിപണിയിൽ അത്യന്തം പ്രീമിയവും എക്സ്ക്ലൂസീവുമായ എസ്യുവിയായി മോഡലിനെ കമ്പനി അവതരിപ്പിച്ചിരിക്കുകയാണ്. പുതിയ മോഡലിന്റെ പ്രാരംഭ എക്സ്-ഷോറൂം വില 2.05 കോടി രൂപയാണ്. യുകെ–ഇന്ത്യ എഫ്ടിഎ കരാറിന് ശേഷമുള്ള വിലനിർണയമാണിത് എന്നതും ശ്രദ്ധേയമാണ്.
കരുത്തിൽ അതിരുകൾ തകർത്ത്
പുതിയ റേഞ്ച് റോവർ സ്പോർട് എസ്വിയിൽ 4.4 ലിറ്റർ ട്വിൻ-ടർബോ V8 മൈൽഡ് ഹൈബ്രിഡ് എഞ്ചിനാണ് ഉപയോഗിച്ചിരിക്കുന്നത്. 626 bhp കരുത്തും 750 Nm ടോർക്കും ഉത്പാദിപ്പിക്കുന്ന ഈ എസ്യുവിക്ക് വെറും 3.8 സെക്കൻഡിൽ 0 മുതൽ 100 കിലോമീറ്റർ വേഗത കൈവരിക്കാൻ കഴിയും. മണിക്കൂറിൽ 290 കിലോമീറ്റർ വരെ പരമാവധി വേഗത കൈവരിക്കാമെന്നാണ് കമ്പനി അവകാശപ്പെടുന്നത്. സ്പോർട്ടി ഡ്രൈവിംഗ് അനുഭവം കൂടുതൽ മികച്ചതാക്കാൻ പ്രത്യേക എസ്വി മോഡും വാഹനത്തിൽ ഉൾപ്പെടുത്തിയിട്ടുണ്ട്. അതിവേഗ യാത്രകളിൽ കൂടുതൽ സ്ഥിരതയും നിയന്ത്രണവും ഉറപ്പാക്കുന്ന അത്യാധുനിക എസ്വി ഷാസി സാങ്കേതികവിദ്യയും ഇതിന്റെ പ്രത്യേകതയാണ്.
ആഡംബര ഡിസൈനിൽ ശ്രദ്ധ പിടിച്ചുപറ്റി
വ്യത്യസ്തമായ ഡിസൈനും പ്രീമിയം ഫിനിഷും പുതിയ മോഡലിനെ കൂടുതൽ ആകർഷകമാക്കുന്നു. ഗ്രീൻ സാറ്റിൻ, ഓറഞ്ച് മാറ്റ്, ബ്ലൂ ഗ്ലോസ്, വയലറ്റ് മാറ്റ്, ടീൽ ഗ്ലോസ് തുടങ്ങിയ ബെസ്പോക്ക് പെയിന്റ് ഓപ്ഷനുകൾ ഉപഭോക്താക്കൾക്ക് ലഭ്യമാണ്. 22 ഇഞ്ച് ഫോർജ്ഡ് അലോയ് വീലുകൾ, ബ്ലാക്ക് കോൺട്രാസ്റ്റ് റൂഫ്, പ്രത്യേക എസ്വി ഡിസൈൻ ഘടകങ്ങൾ എന്നിവ വാഹനത്തിന് കൂടുതൽ സ്പോർട്ടി ഭാവം നൽകുന്നു.
ഇന്റീരിയറിലും ആഡംബരത്തിന് വിട്ടുവീഴ്ചയില്ല. ലൈറ്റ് ക്ലൗഡ്, എബോണി വിൻഡ്സർ ലെതർ സീറ്റുകൾ, സ്ലൈഡിംഗ് പനോരമിക് റൂഫ് എന്നിവ ഉൾപ്പെടുന്ന കാബിൻ കൂടുതൽ വിശാലവും പ്രീമിയവുമായ അനുഭവം നൽകുന്നു.
ലോകത്തിലെ ആദ്യ 6D ഡൈനാമിക്സ് സസ്പെൻഷൻ
ലോകത്തിലെ ആദ്യ 6D ഡൈനാമിക്സ് സസ്പെൻഷൻ സിസ്റ്റമാണ് പുതിയ റേഞ്ച് റോവർ സ്പോർട് എസ്വിയുടെ പ്രധാന ആകർഷണം. ഹൈഡ്രോളിക് സാങ്കേതികവിദ്യ ഉപയോഗിക്കുന്ന ഈ സംവിധാനം മൂർച്ചയുള്ള വളവുകൾ, ബ്രേക്കിംഗ്, വേഗത്തിലുള്ള ആക്സിലറേഷൻ എന്നിവയ്ക്കിടെ വാഹനത്തിന് മികച്ച ബാലൻസ് നൽകുന്നു. ഇതിലൂടെ ഉയർന്ന പ്രകടനത്തിനൊപ്പം മികച്ച യാത്രാസൗകര്യവും ഉറപ്പാക്കുന്നതായി കമ്പനി വ്യക്തമാക്കുന്നു.
കമ്പനി പറയുന്നത്
ഇന്ത്യയിലെ ആഡംബര കാർ വിപണിയിലെ ഉപഭോക്തൃ താൽപര്യങ്ങൾ അതിവേഗം മാറുകയാണെന്ന് Rajan Amba പറഞ്ഞു. ഉയർന്ന പ്രകടനവും പ്രീമിയം സുഖസൗകര്യവും ശക്തമായ ഡ്രൈവിംഗ് അനുഭവവും ഒരുമിച്ച് നൽകുന്ന വാഹനങ്ങളിലേക്കാണ് ഉപഭോക്താക്കളുടെ ശ്രദ്ധ കൂടുതലായി മാറുന്നതെന്നും, പുതിയ റേഞ്ച് റോവർ സ്പോർട് എസ്വി അതിന്റെ മികച്ച ഉദാഹരണമാണെന്നും അദ്ദേഹം കൂട്ടിച്ചേർത്തു.
