ദേശീയപാതകളിൽ തടസ്സമില്ലാത്ത ഗതാഗതം ഉറപ്പാക്കുന്നതിനായി ടോൾ ശേഖരണ സംവിധാനം ഒരു വർഷത്തിനകം പൂർണമായും പരിഷ്കരിക്കുമെന്ന് കേന്ദ്ര ഗതാഗത മന്ത്രി നിതിൻ ഗഡ്കരി അറിയിച്ചു. രാജ്യത്ത് പത്തിടങ്ങളിൽ പരീക്ഷണാടിസ്ഥാനത്തിൽ നടപ്പാക്കിയ പുതിയ സംവിധാനമാണ് ഇനി എല്ലാ ദേശീയപാതകളിലേക്കും വ്യാപിപ്പിക്കുന്നതെന്ന് മന്ത്രി ലോക്സഭയിൽ വ്യക്തമാക്കി. നാഷനൽ പേയ്മെന്റ് കോർപ്പറേഷൻ ഓഫ് ഇന്ത്യ (NPCI) വികസിപ്പിച്ച നാഷനൽ ഇലക്ട്രോണിക് ടോൾ കളക്ഷൻ (NETC) സംവിധാനം വഴിയാണ് ടോൾ പ്ലാസകൾ ഇല്ലാതെ തന്നെ തുക ഈടാക്കുക.
ജിപിഎസ്, ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ (ANPR) ക്യാമറകൾ തുടങ്ങിയവ സ്ഥാപിച്ച് എഐ സഹായത്തോടെയാണ് ടോൾ തുക നിർണയിക്കുന്നത്. ഈ തുക നേരിട്ട് ഫാസ്റ്റാഗിൽ നിന്നാണ് ഈടാക്കുക. നിലവിൽ 10 ലക്ഷം കോടി രൂപ ചെലവിൽ 4,500 പദ്ധതികളാണ് ദേശീയപാത അതോറിറ്റി (NHAI) നടപ്പാക്കുന്നതെന്നും ഗഡ്കരി അറിയിച്ചു.
ടോൾ പ്ലാസകളിലെ തിരക്ക് കുറയ്ക്കുന്നതിനായി വാണിജ്യേതര സ്വകാര്യ വാഹനങ്ങൾക്ക് ഓഗസ്റ്റ് 15 മുതൽ വാർഷിക പാസ് സംവിധാനം എൻഎച്ച്എഐ ഇതിനകം നടപ്പാക്കിയിരുന്നു.
