ദിവസവേതനക്കാരുടെ ശമ്പളത്തില്‍ രാജ്യത്ത് ഒന്നാം സ്ഥാനത്തുള്ളത് കേരളം

ദിവസവേതനക്കാരുടെ ശമ്പളത്തില്‍ രാജ്യത്ത് ഒന്നാം സ്ഥാനത്തുള്ളത് കേരളമെന്ന് റിസർവ്വ് ബാങ്ക് കണക്കുകള്‍. മധ്യ പ്രദേശാണ് പട്ടികയില്‍ ഏറ്റവും പിന്നിലുള്ളത്.

രാജ്യത്ത് ഏറ്റവും കുറഞ്ഞ ദിവസക്കൂലി നൽകുന്ന സംസ്ഥാനമാണ് മധ്യപ്രദേശ്. മധ്യപ്രദേശിലെ പുരുഷന്മാർക്കുള്ള ദിവസക്കൂലി 229.2 രൂപയാണ്. ഗുജറാത്തിൽ ഇത് 241.9 രൂപയാണ്. ദേശീയ ശരാശരി 345.7 രൂപ ആയിരിക്കെയാണ് ഇതിലും കുറവ് ദിവസക്കൂലി ഈ സംസ്ഥാനങ്ങളില്‍ എന്നതാണ് കണക്ക് വിശദമാക്കുന്നത്. മധ്യപ്രദേശിൽ മാസത്തിലെ 25 ദിവസം ജോലി ചെയ്യുന്ന പുരുഷന് ഒരു മാസം കിട്ടുന്നത് 5730 രൂപയാണ്. നാലോ അഞ്ചോ അംഗങ്ങളുള്ള ഒരു കുടുംബത്തിന്റെ ആവശ്യങ്ങള്‍ ഒരു തരത്തിലും പൂർത്തിയാക്കാന്‍ ഈ തുക കൊണ്ട് സാധിക്കില്ലെന്നാണ് ഈ കണക്ക് വ്യക്തമാക്കുന്നത്.അതേസമയം കേരളത്തില്‍ ദിവസക്കൂലിക്ക് ജോലി ചെയ്യുന്ന പുരുഷന് മാസത്തിലെ 25 ദിവസം ജോലി ചെയ്താൽ കിട്ടുന്നത് 19107 രൂപയാണ്.

പ്രാദേശിക സാമ്പത്തിക വ്യവസ്ഥയെയും തൊഴിലുകളേയും വരുമാനത്തേയും കൊവിഡ് മഹാമാരി സാരമായി ബാധിച്ചിട്ടുണ്ട്. ദിവസക്കൂലി ഏറ്റവും പിന്നിലായ സംസ്ഥാനങ്ങളില്‍ ഉത്തർ പ്രദേശുമുണ്ട്. 309.3 രൂപയാണ് ഉത്തർ പ്രദേശിലെ ദിവസക്കൂലി. ഒഡിഷയിൽ ഇത് 285.1 രൂപയാണ്. മഹാരാഷ്ട്രയിൽ 303.5 രൂപയാണ് ദിവസക്കൂലി. ഇതിനാലാണ് മറ്റ് സംസ്ഥാനങ്ങളില്‍ നിന്ന് ദിവസക്കൂലി ജോലികൾക്കായി തൊഴിലാളികള്‍ കേരളത്തിലേക്ക് പോവുന്നതെന്നും കണക്കുകള്‍ വിശദമാക്കുന്നു.

25 ലക്ഷം അതിഥി തൊഴിലാളികളാണ് കേരളത്തിലുള്ളതെന്നാണ് കണക്കുകള്‍ വിശദമാക്കുന്നത്. ജമ്മു കശ്മീരിൽ ദിവസക്കൂലി 550.4 രൂപയും ഹിമാചൽ പ്രദേശില്‍ 473.3, തമിഴ്നാട്ടിൽ 470രൂപയുമാണ്. കാർഷികേതര മേഖലയിലെ ദിവസക്കൂലിയിലും മധ്യപ്രദേശ് പിന്നിലാണ്. 246.3 രൂപയാണ് മധ്യപ്രദേശില്‍ കാർഷികേതര മേഖലയിലെ ദിവസക്കൂലി, ഗുജറാത്തിൽ ഇത് 273.1ഉം ത്രിപുരയിൽ 280.6 രൂപയുമാണ്. കേരളത്തിൽ കാർഷികേതര മേഖലയിലെ ദിവസക്കൂലി 696.6 രൂപയാണ്, ജമ്മു കശ്മീരാണ് തൊട്ട് പിന്നാലെയുള്ളത് 517.9 രൂപ, തമിഴ്നാട് 481.5 രൂപ, ഹരിയാന 451 രൂപ. നിർമ്മാണ മേഖലയിൽ പുരുഷന് കേരളത്തിൽ 852.5 രൂപ ദിവസക്കൂലി ലഭിക്കുമ്പോള്‍ മധ്യ പ്രദേശിൽ 278.7 രൂപയും ഗുജറത്തില്‍ 323.3 രൂപയും ത്രിപുരയിൽ 286.1രൂപയുമാണ്. ദേശീയ ശരാശരി 393.3 രൂപ എന്നിരിക്കെയാണ് ഈ കണക്കുകളുടെ പ്രസക്തി കൂടുന്നത്.