സമീപകാല മലയാള സിനിമയില് ശബ്ദഘോഷങ്ങളില്ലാതെവന്ന് ഹിറ്റ് അടിച്ച് പോയ ചിത്രങ്ങള് പലതുണ്ട്. ആ നിരയിലെ പുതിയ എന്ട്രിയാണ് ഓണം റിലീസ് ആയി എത്തിയ ആര്ഡിഎക്സ്. ഓഗസ്റ്റ് 25 ന് തിയറ്ററുകളിലെത്തിയ ചിത്രത്തിന് ആദ്യ ദിവസം തന്നെ ഒരേ രീതിയില് പോസിറ്റീവ് അഭിപ്രായമാണ് ലഭിച്ചത്. ഓണം റിലീസുകളില് ഏറ്റവും മികച്ച അഭിപ്രായം ലഭിച്ച ചിത്രവും ഇത് തന്നെ. പോസിറ്റീവ് അഭിപ്രായം നേടുന്ന ചിത്രം വളരെ വേഗത്തില് തിയറ്ററുകളില് നിറയ്ക്കുന്ന സമീപകാല ട്രെന്ഡിന്റെ പുതിയ ഉദാഹരണമായി ആര്ഡിഎക്സ് മാറുന്നതാണ് പിന്നാലെ ദൃശ്യമായത്.
ഒന്പത് ദിവസം കൊണ്ട് ആഗോള ബോക്സ് ഓഫീസില് നിന്ന് 50 കോടി നേടിയ ചിത്രം ഇക്കഴിഞ്ഞ ഞായറാഴ്ചയും കാര്യമായി പ്രേക്ഷകരെ തിയറ്ററുകളില് എത്തിച്ചു. ഈ ഞായറാഴ്ച കേരളത്തില് നിന്ന് ചിത്രത്തിന് 2 കോടിക്ക് അടുത്ത് കളക്ഷന് ലഭിച്ചതായാണ് റിപ്പോര്ട്ടുകള്. 17 ദിവസം കൊണ്ട് കേരളത്തില് നിന്ന് മാത്രം 45 കോടിയിലേറെ നേടിയിരിക്കുന്ന ചിത്രം വൈകാതെ കേരളത്തില് നിന്ന് മാത്രമായി 50 കോടി ക്ലബ്ബില് ഇടംപിടിക്കുമെന്നാണ് കരുതപ്പെടുന്നത്. അതേസമയം ആഗോള ബോക്സ് ഓഫീസില് നിന്ന് ചിത്രം ഇതുവരെ 75 കോടി നേടിയതായാണ് ബോക്സ് ഓഫീസ് ട്രാക്കര്മാര് അറിയിക്കുന്നത്.
