ഇന്ഷുറൻസ് പോളിസികൾ ഇനി പഴയ പോലെ പേപ്പർ പോളിസികളായി സൂക്ഷിക്കാനാകില്ല. ഡിജിറ്റലായി മാറ്റണം. ഇതിനായി ഇൻഷുറൻസ് റെഗുലേറ്ററി ആൻഡ് ഡെവലപ്മെന്റ് അതോറിറ്റി ഓഫ് ഇന്ത്യ (ഐആർഡിഎഐ) ഈ വർഷം ഡിസംബറോടെ പുതിയ ഇൻഷുറൻസ് പോളിസികൾക്ക് ഡീമറ്റീരിയലൈസേഷൻ നിർബന്ധമാക്കി. അടുത്ത വർഷം ഡിസംബറോടെ നിലവിലുള്ള അല്ലെങ്കിൽ പഴയ പോളിസികൾ ഡീമറ്റീരിയലൈസ് ചെയ്യാൻ എല്ലാ ഇൻഷുറൻസ് കമ്പനികളോടും റെഗുലേറ്റർ ആവശ്യപ്പെട്ടിട്ടുണ്ട്.
ഇ-ഇൻഷുറൻസ് അക്കൗണ്ടിൽ പോളിസി ഉടമയുടെ ഇൻഷുറൻസ് പോളിസികളുടെ പോർട്ട്ഫോളിയോകൾ ഇലക്ട്രോണിക് രൂപത്തിൽ സൂക്ഷിക്കുന്നു. അതായത് ഇൻഷുറൻസ് പോളിസികളുടെ ഒരു പോർട്ട്ഫോളിയോ ഉണ്ടാക്കാനും അത് ഇലക്ട്രോണിക് രൂപത്തിൽ സൂക്ഷിക്കാനും പോളിസി ഉടമയെ ഡീമറ്റീരിയലൈസേഷൻ അല്ലെങ്കിൽ ‘ഡീമാറ്റ്’ സഹായിക്കും.
ഒരു ഡീമാറ്റ് അക്കൗണ്ടിൽ തന്നെ എല്ലാ ഇൻഷുറൻസുകളും പെടുത്തുവാനുള്ള സൗകര്യവും ഉണ്ടാകും.ആരോഗ്യ ഇൻഷുറൻസ്, മോട്ടോർ ഇൻഷുറൻസ്, ലൈഫ് ഇൻഷുറൻസ് തുടങ്ങിയവയെല്ലാം ഒരു കുടക്കീഴിൽ വരും.
നാഷണൽ സെക്യൂരിറ്റീസ് ഡിപ്പോസിറ്ററി ലിമിറ്റഡ് (എൻഎസ്ഡിഎൽ), സെൻട്രൽ ഡിപ്പോസിറ്ററി സർവീസസ് (സിഡിഎസ്എൽ) അല്ലെങ്കിൽ കാർവി എന്നിവയിൽ ഇൻഷുറൻസ് പോളിസികൾ ഡീമെറ്റീരിയലൈസ് ചെയ്യാം.
