ദീപാവലി ആഘോഷത്തോടനുബന്ധിച്ചുള്ള വ്യാപാരത്തെ പ്രതിഷേധങ്ങളും റാലികളും ബാധിക്കുമെന്ന ആശങ്കയിൽ സമരപരിപാടികൾ മാറ്റിവയ്ക്കണമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധിയോട് ആവശ്യപ്പെട്ട് വ്യാപാരികൾ. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെ പുറത്താക്കുക, വോട്ടർ പട്ടികയിലെ പ്രത്യേക തീവ്ര പരിഷ്കരണ നടപടിയായ എസ്ഐആർ (SIR) നിർത്തിവയ്ക്കുക തുടങ്ങിയ ആവശ്യങ്ങളുന്നയിച്ച് ഇന്ത്യ മുന്നണി നടത്താനിരിക്കുന്ന മഹാറാലിയും മറ്റ് സമരങ്ങളും നവംബർ 10 വരെ മാറ്റിവയ്ക്കണമെന്നാണ് ചേംബർ ഓഫ് ട്രേഡ് ആൻഡ് ഇൻഡസ്ട്രിയുടെ (CTI) ആവശ്യം.
ദീപാവലിയോടനുബന്ധിച്ച് ഡൽഹിയിൽ വലിയ തോതിലുള്ള വ്യാപാരം നടക്കുന്നതിനാൽ പ്രതിഷേധങ്ങൾ വിപണിയെ പ്രതികൂലമായി ബാധിക്കുമെന്ന് സിടിഐ ചെയർമാൻ ബ്രിജേഷ് ഗോയൽ രാഹുൽ ഗാന്ധിക്ക് അയച്ച കത്തിൽ ചൂണ്ടിക്കാട്ടി.
ധൻതേരസിൽ 25,000 കോടിയുടെ വ്യാപാരം പ്രതീക്ഷ
ദീപാവലിക്ക് മുന്നോടിയായുള്ള ധൻതേരസ് ദിനത്തിൽ ഡൽഹിയിൽ സാധാരണയായി 25,000 കോടി രൂപയിൽ കുറയാത്ത വ്യാപാരം നടക്കാറുണ്ടെന്നാണ് വ്യാപാര സംഘടനയുടെ വിലയിരുത്തൽ. സ്വർണം, വെള്ളി, ഇലക്ട്രോണിക് ഉൽപന്നങ്ങൾ, വസ്ത്രങ്ങൾ, മധുരപലഹാരങ്ങൾ, ഉണക്കപ്പഴങ്ങൾ, വാഹനങ്ങൾ, വീട്, ഭൂമി, ഉപഹാരങ്ങൾ തുടങ്ങി വിവിധ മേഖലകളിൽ വൻതോതിലുള്ള വിൽപനയാണ് ഈ കാലയളവിൽ പ്രതീക്ഷിക്കുന്നത്.ഹൈന്ദവ വിശ്വാസപ്രകാരം പുതിയ വസ്തുക്കൾ വാങ്ങാൻ ഐശ്വര്യപ്രദമായ ദിനമായി കണക്കാക്കപ്പെടുന്നതിനാൽ ധൻതേരസിന് വിപണിയിൽ പ്രത്യേക പ്രാധാന്യമുണ്ട്. ഇത്തവണയും വലിയ വ്യാപാരമാണ് പ്രതീക്ഷിക്കുന്നതെന്നും എന്നാൽ റാലികളും സമരങ്ങളും തുടർന്നാൽ ഏകദേശം 10,000 കോടി രൂപയുടെ കച്ചവടനഷ്ടമുണ്ടാകുമെന്നുമാണ് ബ്രിജേഷ് ഗോയലിന്റെ മുന്നറിയിപ്പ്.
നവംബർ ഒന്നിന് ഇന്ത്യ മുന്നണിയുടെ മഹാറാലി
നവംബർ ഒന്നിന് ഡൽഹിയിലെ രാംലീല മൈതാനിയിൽ മഹാറാലി നടത്താനാണ് ഇന്ത്യ മുന്നണി തീരുമാനിച്ചിരിക്കുന്നത്. നവംബർ എട്ടിനാണ് ദീപാവലി. ഇതിനിടയിൽ പ്രതിഷേധ പരിപാടികൾ നടക്കുന്നത് മറ്റ് സംസ്ഥാനങ്ങളിൽനിന്ന് ഉത്സവകാല ഷോപ്പിങ്ങിനായി ഡൽഹിയിലെത്തുന്ന ഉപഭോക്താക്കൾക്ക് യാത്രാതടസ്സങ്ങളുണ്ടാക്കുമെന്നാണ് വ്യാപാരികളുടെ ആശങ്ക.റെയിൽവേ സ്റ്റേഷനുകൾ, മെട്രോ സ്റ്റേഷനുകൾ, പ്രധാന വ്യാപാര കേന്ദ്രങ്ങൾ എന്നിവിടങ്ങളിലേക്കുള്ള ഗതാഗതം തടസ്സപ്പെടുന്നത് ഉപഭോക്താക്കളുടെ വരവ് കുറയ്ക്കാനും വിപണിയിലെ വിൽപനയെ ബാധിക്കാനും ഇടയാക്കും. ബാരിക്കേഡുകളും ഗതാഗത നിയന്ത്രണങ്ങളും വ്യാപാര കേന്ദ്രങ്ങളുടെ പ്രവർത്തനത്തെ സാരമായി ബാധിക്കുമെന്നും സംഘടന ചൂണ്ടിക്കാട്ടുന്നു.
ഒക്ടോബറിൽ മാത്രം 3,000 കോടിയുടെ നഷ്ടമെന്ന് പരാതി
ഒക്ടോബറിൽ ഇതുവരെ നടന്ന സമരങ്ങളും റാലികളും കാരണം വ്യാപാരികൾക്ക് 3,000 കോടിയിലധികം രൂപയുടെ നഷ്ടമുണ്ടായെന്നാണ് ബ്രിജേഷ് ഗോയൽ അവകാശപ്പെടുന്നത്. ചില്ലറ, മൊത്ത വ്യാപാര മേഖലകളെ ഒരുപോലെ പ്രതിഷേധങ്ങൾ ബാധിക്കുന്നുണ്ടെന്നും അദ്ദേഹം പറഞ്ഞു.ഡൽഹിയിലെ പ്രധാന വ്യാപാര കേന്ദ്രങ്ങളിൽനിന്ന് രാജ്യത്തിന്റെ വിവിധ ഭാഗങ്ങളിലേക്ക് ഉൽപന്നങ്ങൾ വിതരണം ചെയ്യുന്നുണ്ട്. അതിനാൽ ഗതാഗത നിയന്ത്രണങ്ങളും വിപണിയിലെ തടസ്സങ്ങളും പ്രാദേശിക വ്യാപാരത്തെ മാത്രമല്ല, മറ്റ് സംസ്ഥാനങ്ങളിലേക്കുള്ള ചരക്കുനീക്കത്തെയും ബാധിക്കുമെന്നാണ് വ്യാപാര സംഘടനയുടെ വിലയിരുത്തൽ.
ഉത്സവകാല വ്യാപാരത്തിന് നിർണായകമായ ദിവസങ്ങളിൽ സമരങ്ങളും റാലികളും ഒഴിവാക്കണമെന്നാണ് വ്യാപാരികളുടെ ആവശ്യം. രാഷ്ട്രീയ പ്രതിഷേധങ്ങൾ വ്യാപാരത്തെയും ഉപഭോക്താക്കളുടെ യാത്രയെയും ബാധിക്കാതിരിക്കാനുള്ള നടപടികൾ സ്വീകരിക്കണമെന്നും സിടിഐ ആവശ്യപ്പെട്ടു.
