പുതിയ സ്ട്രോങ് ഹൈബ്രിഡ് പതിപ്പുമായി റെനോ ഡസ്റ്റർ വിപണിയിൽ. 160 എച്ച്പി കരുത്തും ലിറ്ററിന് 29 കിലോമീറ്റർ മൈലേജും വാഗ്ദാനം ചെയ്യുന്ന എസ്യുവിയുടെ പ്രാരംഭ വില 16.99 ലക്ഷം രൂപയാണ്. ഇവല്യൂഷൻ, ടെക്നോ, ഇമോഷൻ എന്നിങ്ങനെ മൂന്ന് വേരിയന്റുകളിലാണ് പുതിയ മോഡൽ ലഭ്യമാകുന്നത്. മികച്ച ഇന്ധനക്ഷമതയ്ക്കൊപ്പം ആധുനിക ഫീച്ചറുകളും ഉൾപ്പെടുത്തിയാണ് റെനോ പുതിയ ഡസ്റ്റർ അവതരിപ്പിച്ചിരിക്കുന്നത്.
1.8 ലീറ്റർ ഹൈബ്രിഡ് എൻജിൻ
1.8 ലീറ്റർ നാല് സിലിണ്ടർ പെട്രോൾ എൻജിനും 1.4 kWh, 247V ബാറ്ററിയും സംയോജിപ്പിച്ചാണ് പുതിയ ഡസ്റ്ററിന്റെ ഹൈബ്രിഡ് സംവിധാനം ഒരുക്കിയിരിക്കുന്നത്. പെട്രോൾ എൻജിനും ഇലക്ട്രിക് മോട്ടോറും ഒരുമിച്ച് പ്രവർത്തിക്കുന്നതിലൂടെ 160 എച്ച്പി പരമാവധി കരുത്തും 208 എൻഎം ടോർക്കും ലഭിക്കും. ലിറ്ററിന് 29 കിലോമീറ്റർ മൈലേജാണ് കമ്പനി അവകാശപ്പെടുന്നത്.റെനോയുടെ CMF-B പ്ലാറ്റ്ഫോമിൽ നിർമിച്ചിരിക്കുന്ന വാഹനത്തിൽ നിക്കൽ മാംഗനീസ് കോബാൾട്ട് (NMC) സാങ്കേതികവിദ്യയിലുള്ള ബാറ്ററിയാണ് ഉപയോഗിച്ചിരിക്കുന്നത്. നിലവിലുള്ള 1.0 ലീറ്റർ, 1.3 ലീറ്റർ ടർബോ പെട്രോൾ എൻജിൻ പതിപ്പുകൾക്കൊപ്പം പുതിയ ഹൈബ്രിഡ് പതിപ്പും ഡസ്റ്റർ നിരയിൽ ഇടംപിടിക്കും.
നഗരയാത്രകളിൽ ഇലക്ട്രിക് ഡ്രൈവിങ്
നഗരങ്ങളിലെ യാത്രകളിൽ 80 ശതമാനം വരെ ദൂരം ഇലക്ട്രിക് മോഡിൽ സഞ്ചരിക്കാനാകുമെന്നാണ് കമ്പനിയുടെ അവകാശവാദം. പൂജ്യത്തിൽ നിന്ന് മണിക്കൂറിൽ 100 കിലോമീറ്റർ വേഗത്തിലെത്താൻ 9.6 സെക്കൻഡ് മതിയാകും.ഫോർമുല വൺ റേസിങ്ങിൽ നിന്നുള്ള സാങ്കേതിക പരിചയം പ്രയോജനപ്പെടുത്തി വികസിപ്പിച്ചെടുത്ത ഇ-ടെക് (E-Tech) ഹൈബ്രിഡ് സംവിധാനമാണ് വാഹനത്തിന്റെ മറ്റൊരു പ്രത്യേകത. സാധാരണ ഗിയർബോക്സുകളിൽ നിന്ന് വ്യത്യസ്തമായ മൾട്ടി-മോഡ് ഓട്ടോമേറ്റഡ് ഗിയർബോക്സും ഇതിൽ ഉൾപ്പെടുത്തിയിട്ടുണ്ട്.
പ്രധാന ഫീച്ചറുകൾ
പുതിയ ഡസ്റ്റർ സ്ട്രോങ് ഹൈബ്രിഡിൽ ഉൾപ്പെടുത്തിയിരിക്കുന്ന പ്രധാന സവിശേഷതകൾ:
• ന്യൂ ഡ്യൂൺ ബ്രൗൺ ലെതറേറ്റ് അപ്ഹോൾസ്റ്ററി
• വെന്റിലേറ്റഡ് സീറ്റുകൾ
• 18 ഇഞ്ച് ഡയമണ്ട് കട്ട് അലോയ് വീലുകൾ
• 10.25 ഇഞ്ച് TFT ഡ്രൈവർ ഡിസ്പ്ലേ
• ആറ് തരത്തിൽ ക്രമീകരിക്കാവുന്ന ഡ്രൈവർ സീറ്റ്
ഇന്ധനക്ഷമതയ്ക്കും പ്രകടനത്തിനും പ്രാധാന്യം നൽകുന്ന ഉപഭോക്താക്കളെ ലക്ഷ്യമിട്ടാണ് പുതിയ ഹൈബ്രിഡ് എസ്യുവിയെ റെനോ വിപണിയിൽ അവതരിപ്പിച്ചിരിക്കുന്നത്.
