Airport Privatization | Kerala Airports:
രാജ്യത്തെ 11 വിമാനത്താവളങ്ങൾ കൂടി സ്വകാര്യ മേഖലയ്ക്ക് കൈമാറാൻ കേന്ദ്ര സർക്കാർ നീക്കം. എയർപോർട്ട് അതോറിറ്റി ഓഫ് ഇന്ത്യയുടെ (AAI) നിയന്ത്രണത്തിലുള്ള വിമാനത്താവളങ്ങൾ പൊതു-സ്വകാര്യ പങ്കാളിത്ത (PPP) മാതൃകയിൽ വികസിപ്പിക്കാനുള്ള നിർദേശത്തിന് ബന്ധപ്പെട്ട സമിതി അനുമതി നൽകി.
ഒരു വലിയ വിമാനത്താവളത്തിനൊപ്പം ഒരു ചെറിയ വിമാനത്താവളം കൂടി ഉൾപ്പെടുത്തി അഞ്ച് ബണ്ടിലുകളായാണ് വിമാനത്താവളങ്ങൾ സ്വകാര്യ മേഖലയ്ക്ക് കൈമാറുന്നത്. വലിയ വിമാനത്താവളങ്ങളുടെ നടത്തിപ്പ് ഏറ്റെടുക്കുന്ന കമ്പനികൾ അതിനൊപ്പം ഉൾപ്പെടുത്തിയിട്ടുള്ള ചെറിയ വിമാനത്താവളങ്ങളുടെ വികസനവും ഏറ്റെടുക്കണമെന്നതാണ് പ്രധാന വ്യവസ്ഥ.
ഏത് വിമാനത്താവളങ്ങളാണ് പട്ടികയിൽ?
നിലവിലെ നിർദേശപ്രകാരം അഞ്ച് പ്രധാന വിമാനത്താവളങ്ങളും ആറ് ചെറിയ വിമാനത്താവളങ്ങളുമാണ് സ്വകാര്യ പങ്കാളിത്തത്തിനായി പരിഗണിക്കുന്നത്.
പ്രധാന വിമാനത്താവളങ്ങൾ:
• അമൃത്സർ
• വാരാണസി
• ഭുവനേശ്വർ
• റായ്പൂർ
• തിരുച്ചിറപ്പള്ളി
ചെറിയ വിമാനത്താവളങ്ങൾ:
• കാംഗ്ര
• ഗയ
• കുശിനഗർ
• ഹുബ്ബള്ളി
• ഔറംഗാബാദ്
• തിരുപ്പതി
ഇവയിൽ ഒരു വലിയ വിമാനത്താവളവും അനുബന്ധമായി ഒരു ചെറിയ വിമാനത്താവളവും ഉൾപ്പെടുത്തി ബണ്ടിലുകളാക്കും.
50 വർഷത്തേക്ക് സ്വകാര്യ കമ്പനികൾക്ക് നടത്തിപ്പ്
വിമാനത്താവളങ്ങളുടെ നടത്തിപ്പ്, പരിപാലനം, വികസനം എന്നിവ 50 വർഷത്തേക്ക് സ്വകാര്യ കമ്പനികൾക്ക് നൽകാനാണ് നിർദേശം. പദ്ധതിയുടെ സ്പോൺസറായും നടത്തിപ്പ് ഏജൻസിയായും എയർപോർട്ട് അതോറിറ്റി ഓഫ് ഇന്ത്യ തുടരും.വ്യോമയാന മേഖലയിലേക്ക് കൂടുതൽ സ്വകാര്യ നിക്ഷേപവും ആധുനിക മാനേജ്മെന്റ് സംവിധാനങ്ങളും കൊണ്ടുവരികയാണ് കേന്ദ്ര സർക്കാരിന്റെ പ്രധാന ലക്ഷ്യം.നിർദേശിച്ചിരിക്കുന്ന ബണ്ടിൽ മാതൃകയിൽ സ്വകാര്യ കമ്പനികൾക്ക് താൽപര്യമുണ്ടോ എന്ന് വ്യോമയാന മന്ത്രാലയം ഉടൻ പരിശോധിക്കും. സ്വകാര്യ കമ്പനികളുടെ അഭിപ്രായങ്ങളും നിർദേശങ്ങളും പരിഗണിച്ച ശേഷമായിരിക്കും അന്തിമ പദ്ധതി തയ്യാറാക്കുക. ആവശ്യമെങ്കിൽ നിലവിലെ നിർദേശങ്ങളിൽ മാറ്റം വരുത്താനും സാധ്യതയുണ്ട്.
കേരളത്തിലെ വിമാനത്താവളങ്ങൾ അടുത്ത ഘട്ടത്തിൽ?
കേരളത്തെ സംബന്ധിച്ചിടത്തോളം ഏറെ ശ്രദ്ധേയമായ കാര്യം അടുത്ത ഘട്ടത്തിൽ സംസ്ഥാനത്തെ വിമാനത്താവളങ്ങളും പട്ടികയിൽ ഉൾപ്പെട്ടേക്കാമെന്നതാണ്.ദേശീയ ധനസമ്പാദന പദ്ധതിയായ നാഷനൽ മോണിറ്റൈസേഷൻ പൈപ്പ്ലൈൻ (NMP) 2.0യുടെ ഭാഗമായി എയർപോർട്ട് അതോറിറ്റി ഓഫ് ഇന്ത്യയുടെ കീഴിലുള്ള 26 വിമാനത്താവളങ്ങൾ സ്വകാര്യ മേഖലയ്ക്ക് കൈമാറാനാണ് കേന്ദ്ര നീക്കം.അഞ്ച് വർഷത്തിനുള്ളിൽ നടപടികൾ പൂർത്തിയാക്കാനാണ് ലക്ഷ്യമിടുന്നത്. ഇതിലൂടെ ഏകദേശം 14,950 കോടി രൂപ സമാഹരിക്കാനാകുമെന്നാണ് കേന്ദ്രത്തിന്റെ പ്രതീക്ഷ.ആദ്യഘട്ടമായാണ് ഇപ്പോൾ 11 വിമാനത്താവളങ്ങളുടെ പട്ടിക തയ്യാറാക്കിയിരിക്കുന്നത്. അടുത്ത ഘട്ടത്തിൽ കേരളത്തിലെ കരിപ്പൂർ വിമാനത്താവളം ഉൾപ്പെടെയുള്ള വിമാനത്താവളങ്ങളും പരിഗണിക്കപ്പെടാൻ സാധ്യതയുണ്ടെന്നാണ് വിവരം.
2019ൽ ആരംഭിച്ച സ്വകാര്യവൽക്കരണം
എയർപോർട്ട് അതോറിറ്റി ഓഫ് ഇന്ത്യയുടെ കീഴിലുള്ള വിമാനത്താവളങ്ങൾ സ്വകാര്യ മേഖലയ്ക്ക് കൈമാറുന്ന നടപടികൾക്ക് 2019ലാണ് തുടക്കമായത്.ആദ്യ ഘട്ടത്തിൽ അഹമ്മദാബാദ്, ലഖ്നൗ, മംഗളൂരു വിമാനത്താവളങ്ങൾ 50 വർഷത്തേക്ക് അദാനി ഗ്രൂപ്പിന് അനുവദിച്ചു. തുടർന്ന് രണ്ടാം ഘട്ടത്തിൽ ജയ്പൂർ, ഗുവാഹത്തി, തിരുവനന്തപുരം വിമാനത്താവളങ്ങളും സ്വകാര്യ നടത്തിപ്പിലേക്ക് മാറ്റി.ഇതോടെ രാജ്യത്തെ വിമാനത്താവള മേഖലയിൽ സ്വകാര്യ പങ്കാളിത്തം കൂടുതൽ വിപുലീകരിക്കാനുള്ള നീക്കത്തിലാണ് കേന്ദ്ര സർക്കാർ.
