രാജ്യത്തെ ഓൺലൈൻ ഗെയിമിംഗ് മേഖലയെ അടിമുടി മാറ്റുന്ന പുതിയ നിയന്ത്രണങ്ങളുമായി കേന്ദ്ര സർക്കാർ രംഗത്ത്. 2025 ഓഗസ്റ്റിൽ പാസാക്കിയ ‘പ്രമോഷൻ ആൻഡ് റെഗുലേഷൻ ഓഫ് ഓൺലൈൻ ഗെയിമിംഗ് ആക്ട്’ പ്രകാരം, പുതിയ നിയമങ്ങൾ മെയ് 1 മുതൽ പ്രാബല്യത്തിൽ വരും. പണം വെച്ചുള്ള ഓൺലൈൻ ഗെയിമുകൾക്ക് രാജ്യത്തുടനീളം നിരോധനം ഏർപ്പെടുത്തുന്നതാണ് ഇതിലെ ഏറ്റവും പ്രധാന തീരുമാനം. അതേസമയം, ഇ-സ്പോർട്സ്, സോഷ്യൽ ഗെയിമിംഗ് മേഖലകൾക്ക് കൂടുതൽ നിയമപരമായ പിന്തുണയും പ്രോത്സാഹനവും ലഭിക്കും.
പുതിയ ചട്ടങ്ങൾ പ്രാബല്യത്തിൽ വരുന്നതോടെ ഗെയിമിംഗ് കമ്പനികൾക്കും ഉപഭോക്താക്കൾക്കും കർശന മാർഗ്ഗനിർദ്ദേശങ്ങൾ പാലിക്കേണ്ടിവരും. പണമിടപാടുകൾ ഉൾപ്പെടുന്ന ഗെയിമുകൾക്ക് പൂർണ്ണ വിലക്ക് ബാധകമാകുമ്പോൾ, സൗജന്യമായി കളിക്കാവുന്ന സോഷ്യൽ ഗെയിമുകളും ഇ-സ്പോർട്സുകളും തുടരുമെന്ന് സർക്കാർ വ്യക്തമാക്കുന്നു. പ്രായപരിധി നിശ്ചയിക്കൽ, ദിവസേന കളിക്കുന്ന സമയത്തിന് നിയന്ത്രണം, മാതാപിതൃ നിയന്ത്രണ സംവിധാനങ്ങൾ എന്നിവ എല്ലാ പ്ലാറ്റ്ഫോമുകളിലും നിർബന്ധമാക്കും.
ഓരോ ഗെയിമിംഗ് പ്ലാറ്റ്ഫോമിനും പ്രത്യേക പരാതി പരിഹാര സംവിധാനവും നിർബന്ധമാകും. ഉപഭോക്താക്കൾക്ക് പ്രശ്നങ്ങൾ ഉണ്ടാകുമ്പോൾ ആദ്യം കമ്പനിയുടെ ഗ്രീവൻസ് സെല്ലിനെ സമീപിക്കാം. അവിടെ പരിഹാരം ലഭിക്കാത്ത പക്ഷം 30 ദിവസത്തിനുള്ളിൽ ഓൺലൈൻ ഗെയിമിംഗ് അതോറിറ്റി ഓഫ് ഇന്ത്യയ്ക്ക് അപ്പീൽ നൽകാം. തുടർന്ന് അവസാന അപ്പീലായി ഐടി സെക്രട്ടറിയെ സമീപിക്കാനുള്ള സൗകര്യവും ഉണ്ടാകും.ഏത് ഗെയിമുകളാണ് ‘പണം വെച്ചുള്ളത്’ എന്നത് നിർണയിക്കാൻ നിയമം വ്യക്തമായ മാനദണ്ഡങ്ങളും നിർദേശിക്കുന്നു. ഗെയിം കളിക്കാൻ ഫീസ് അടയ്ക്കേണ്ടതുണ്ടോ, ജയിച്ചാൽ പണമോ സമ്മാനങ്ങളോ ലഭിക്കുന്നുണ്ടോ, ഗെയിമിനുള്ളിലെ ആസ്തികൾ യഥാർത്ഥ പണമായി മാറ്റാനാകുമോ തുടങ്ങിയ ഘടകങ്ങൾ ഇതിൽ പരിഗണിക്കും. ഇത്തരം വിവരങ്ങൾ ഉപഭോക്താക്കൾക്ക് വ്യക്തമായി പ്രദർശിപ്പിക്കണമെന്നും നിർദ്ദേശമുണ്ട്.
നികുതി കാര്യത്തിലും സർക്കാർ കർശന നിലപാട് സ്വീകരിച്ചിരിക്കുകയാണ്. ഓൺലൈൻ ഗെയിമിംഗിൽ നിന്നുള്ള വരുമാനത്തിന് ആദായനികുതി നിയമപ്രകാരം 30 ശതമാനം നികുതി ഈടാക്കും. കൂടാതെ, ഉപഭോക്താക്കളുടെ ഗെയിമിംഗ് അക്കൗണ്ടുകളിൽ ഉള്ള തുകയ്ക്ക് ടിഡിഎസ് ബാധകമായിരിക്കും.മൊത്തത്തിൽ, ഓൺലൈൻ ഗെയിമിംഗ് മേഖലയെ കൂടുതൽ നിയന്ത്രിതവും സുരക്ഷിതവുമായി മാറ്റുന്നതിനൊപ്പം, പണമിടപാടുകൾ ഉൾപ്പെടുന്ന ഗെയിമുകളുടെ വ്യാപനം കുറയ്ക്കാനാണ് സർക്കാരിന്റെ പുതിയ നീക്കം ലക്ഷ്യമിടുന്നത്.
