ഇറ്റാലിയൻ ഇരുചക്ര വാഹന നിർമ്മാതാക്കളായ Vespa ‘ഓഫീസിന 8’ എന്ന പേരിൽ പുതിയ സ്പെഷ്യൽ എഡിഷൻ സ്കൂട്ടർ വിപണിയിൽ അവതരിപ്പിച്ചു. ഇറ്റലിയിലെ പോണ്ടെഡെറയിലെ Piaggio പ്ലാന്റിലെ പരീക്ഷണ വിഭാഗത്തിന് ആദരവ് അർപ്പിക്കുന്ന മോഡലാണ് ഇത്.
1944-ൽ പോണ്ടെഡെറ പ്ലാന്റിൽ സ്ഥാപിതമായ എക്സ്പിരിമെന്റൽ വിഭാഗത്തെയാണ് ‘ഓഫീസിന 8’ എന്ന പേര് സൂചിപ്പിക്കുന്നത്. പതിവ് പ്രൊഡക്ഷൻ ലൈനുകളിൽ നിന്ന് വേറിട്ടു പ്രവർത്തിച്ചിരുന്ന എഞ്ചിനീയർമാർ, ഡിസൈനർമാർ, മെക്കാനിക്കുകൾ എന്നിവരടങ്ങിയ സമർപ്പിത സംഘമാണ് ഈ വിഭാഗം. പുതിയ ആശയങ്ങളും ടെസ്റ്റ് പ്രോട്ടോടൈപ്പുകളും വികസിപ്പിച്ച ഇവരുടെ പരിശ്രമഫലമായി 1946-ൽ വെസ്പയുടെ പേറ്റന്റിംഗിലേക്ക് കാര്യങ്ങൾ നീങ്ങിയതായാണ് ചരിത്രം.
ഡിസൈൻ കാര്യത്തിൽ, മാറ്റ് മെറ്റാലിക് ബ്ലൂ ഫിനിഷുള്ള സ്റ്റീൽ ബോഡിയാണ് ‘ഓഫീസിന 8’-ന്റെ പ്രധാന ആകർഷണം. മെറ്റാലിക് റിവറ്റുകളും ബ്രാസ്, അലുമിനിയം ടോണുകളും ചേർന്ന് സ്കൂട്ടറിന് വ്യത്യസ്തമായ ഇൻഡസ്ട്രിയൽ ലുക്ക് നൽകുന്നു. വെസ്പയുടെ സിഗ്നേച്ചർ വൃത്താകൃതിയിലുള്ള ഹെഡ്ലാമ്പും സ്വീപ്പിംഗ് ലൈനുകളും നിലനിർത്തിയതോടൊപ്പം, തീമിനൊത്ത റിബ്ഡ് സീറ്റും ഈ പതിപ്പിൽ ഉൾപ്പെടുത്തിയിട്ടുണ്ട്.
ഇന്ത്യയിൽ 125 സിസി, 150 സിസി എൻജിൻ ഓപ്ഷനുകളിലാണ് ‘ഓഫീസിന 8’ ലഭ്യമാകുന്നത്. മെക്കാനിക്കൽ ഭാഗങ്ങളിൽ വലിയ മാറ്റങ്ങളില്ലെങ്കിലും, പുറം രൂപകൽപ്പനയും പ്രത്യേക ഫിനിഷും ഈ മോഡലിനെ വ്യത്യസ്തമാക്കുന്നു.
അതേസമയം, ‘ഓഫീസിന 8’ അപ്പാരൽ ശ്രേണിയും കമ്പനി അവതരിപ്പിച്ചിട്ടുണ്ട്. നിറങ്ങളോട് പൊരുത്തപ്പെടുന്ന ടോപ്പ് ബോക്സ് തിരഞ്ഞെടുക്കാനുള്ള സൗകര്യവും ഉപഭോക്താക്കൾക്ക് ലഭിക്കും. വർക്ക്ഷോപ്പിന്റെ ചരിത്രം വിശദീകരിക്കുന്ന ഒരു പുസ്തകവും, നിറം പൊരുത്തപ്പെടുന്ന ഹാഫ്-ഫേസ് ഹെൽമെറ്റും ഉൾപ്പെട്ട വെൽക്കം കിറ്റും ഓരോ സ്കൂട്ടറിനൊപ്പവും ലഭ്യമാക്കും.ഇന്ത്യയിലുടനീളമുള്ള തിരഞ്ഞെടുത്ത ഡീലർഷിപ്പുകളിൽ ഈ സ്പെഷ്യൽ എഡിഷൻ ലഭ്യമാണ്. എക്സ്-ഷോറൂം വില 1.34 ലക്ഷം രൂപയാണ്. പതിവ് മോഡലുകളിൽ നിന്ന് വ്യത്യസ്തമായ, പൈതൃകത്തിന്റെ ചായം കൈവരിച്ച ഒരു എക്സ്ക്ലൂസീവ് സ്കൂട്ടർ ആഗ്രഹിക്കുന്നവർക്ക് ‘വെസ്പ ഓഫീസിന 8’ ശ്രദ്ധേയമായൊരു തിരഞ്ഞെടുപ്പായിരിക്കും.
