ലോക സാമ്പത്തിക സമത്വം സാങ്കേതിക വിദ്യയുടെ കരുതലിൽ പുനർനിർമ്മിക്കാൻ ഒരുങ്ങുകയാണ് ഇലോൺ മസ്ക്. ടെസ്ലയുടെ മേധാവിയായ മസ്ക് അവതരിപ്പിച്ച ഏറ്റവും പുതിയ ദൃശ്യം, ഒരു ഹൈ-ടെക് ദാരിദ്ര്യനിർമ്മാർജന സ്വപ്നമാണ്. മനുഷ്യരുടെ എല്ലാ ജോലികളും തന്റെ കമ്പനി നിർമ്മിച്ച ഒപ്റ്റിമസ് റോബോട്ട് ചെയ്തോളുമെന്നും, അതിലൂടെ ലോകമെമ്പാടുമുള്ളവർക്ക് “യൂണിവേഴ്സൽ ഹൈ ഇൻകം” നൽകുമെന്നും മസ്ക് പ്രഖ്യാപിച്ചു.
ഒരു ട്രില്ല്യൺ ഡോളർ വേതന പാക്കേജ് അംഗീകരിക്കപ്പെട്ട മസ്ക്, ടെസ്ല ഓഹരി ഉടമകളുടെ യോഗത്തിൽ പറഞ്ഞത്, ഭാവിയിൽ മനുഷ്യ അധ്വാനം തന്നെ അനാവശ്യമാക്കുന്ന കാലം വരും എന്നായിരുന്നു.
“ഭാവിയുടെ സമൃദ്ധി”: മസ്കിന്റെ ദർശനം
ചൊവ്വയിൽ മനുഷ്യ കോളനി സ്ഥാപിക്കണമെന്ന സ്വപ്നം യാഥാർത്ഥ്യമാക്കാനുള്ള ശ്രമത്തിൽ നിന്നുതുടങ്ങി, അനവധി അസാധാരണ ആശയങ്ങൾ കൊണ്ട് ലോകത്തെ ഞെട്ടിച്ചിട്ടുള്ള മസ്ക്, ഇപ്പോൾ മനുഷ്യരുടെ ദൈനംദിനജീവിതം തന്നെ പുനർരൂപപ്പെടുത്താനൊരുങ്ങുകയാണ്.ഒപ്റ്റിമസ് വെറുമൊരു ഫാക്ടറി അസിസ്റ്റന്റ് മാത്രമല്ല; മനുഷ്യ ഇടപെടലില്ലാതെ നിരന്തരമായ ഉത്പാദനവും സേവനവും സാധ്യമാക്കുന്ന ‘സുസ്ഥിര സമൃദ്ധിയുടെ’ അടിത്തറ ആണെന്ന് മസ്ക് പറയുന്നു. റോബോട്ടുകൾക്ക് ഇടതടവില്ലാതെ ജോലിചെയ്യാൻ കഴിയുന്നതിനാൽ ഉത്പാദനം 10 മടങ്ങിലധികം വർധിപ്പിക്കാനാകും. ഇതിലൂടെ, “ഒരോ വ്യക്തിയുടെയും ആവശ്യത്തിന് മതിയാവുന്നതിലേറെ ഉത്പാദിപ്പിക്കാനാകും,” എന്നാണ് മസ്കിന്റെ വാദം.
“ജോലി വേണമെങ്കിൽ — ഹോബി ആയി ചെയ്യാം”
മസ്കിന്റെ ഭാവിദൃശ്യത്തിൽ, മനുഷ്യർക്ക് ജോലിയെടുക്കേണ്ടത് നിർബന്ധമല്ല. ജോലിയെടുക്കണമെങ്കിൽ അതിനെ ഹോബി പോലെ ചെയ്യാമത്രെ. “റോബോട്ടുകൾ ഉത്പാദനത്തിനായി പണി ചെയ്യട്ടെ, മനുഷ്യർ സൃഷ്ടിപരമായ കാര്യങ്ങളിൽ സമയം ചെലവിടട്ടെ,” എന്നതാണ് അദ്ദേഹത്തിന്റെ ആശയം.
മുന്നോട്ടുള്ള റേസ്
മസ്കിന് അനുവദിച്ച $1 ട്രില്ല്യൺ പേ പാക്കേജ് നേടാൻ, ടെസ്ലയുടെ ഉത്പാദനം വളർത്തുകയും അടുത്ത പതിറ്റാണ്ടിനുള്ളിൽ 10 ലക്ഷം ഒപ്റ്റിമസ് റോബോട്ടുകൾ വിൽക്കുകയും വേണം. അതിനായി ടെസ്ല ഇലക്ട്രിക് കാർ നിർമ്മാണ പരിധി കടന്ന്, റോബോട്ടിക്സും എഐയും ഉൾപ്പെടുന്ന പുതിയ ഹൈ-ടെക് പാതയിലേക്ക് പടരുകയാണ്.
വിമർശനങ്ങളും ചോദ്യങ്ങളും
മസ്കിന്റെ ഈ ‘യൂണിവേഴ്സൽ ഹൈ ഇൻകം’ സ്വപ്നം പലർക്കും ആകർഷകമായാലും, സാമൂഹ്യ സാമ്പത്തിക വിദഗ്ധർ മുന്നറിയിപ്പുകൾ ഉയർത്തുന്നു.ഓട്ടോമേഷൻ ചരിത്രപരമായി സമത്വം കുറച്ചിട്ടുള്ളതും, യന്ത്രങ്ങൾ സ്വന്തമാക്കാൻ കഴിയുന്നവർക്ക് കൂടുതൽ സമ്പത്ത് ലഭിക്കുന്നതുമാണ് അവരിൽ പലരും ചൂണ്ടിക്കാണിക്കുന്നത്.
“മസ്ക് പറയുന്ന വരുമാന പദ്ധതി നടപ്പാക്കുക ആരാണ്? പണം എവിടെ നിന്നാണ് വരുന്നത്? അതിനെ നിയന്ത്രിക്കുക ഏത് ഗവൺമെന്റാണ്?” എന്ന ചോദ്യങ്ങൾ നിരന്തരം ഉയരുന്നു.
യാഥാർത്ഥ്യത്തിലേക്ക് എത്ര ദൂരം?
മസ്കിന്റെ ഒപ്റ്റിമസ് ഇപ്പോഴും ‘മുട്ടയിൽനിന്ന് വിരിഞ്ഞിട്ടില്ല’. പ്രദർശിപ്പിച്ചിട്ടുള്ള മോഡലുകൾക്ക് പ്രാഥമിക പ്രവർത്തനങ്ങൾ മാത്രമേ ചെയ്യാൻ കഴിയൂ. വിമർശകർ പറയുന്നത്, “ജോലി ചെയ്യേണ്ടതില്ലാത്ത മനുഷ്യർ” എന്ന ആശയം സാമൂഹ്യ അസ്ഥിരതയ്ക്ക് കാരണമാകും എന്നതാണ്.എന്നാൽ, മസ്ക് അതിൽ പിന്മാറുന്നില്ല. “മനുഷ്യർക്ക് കൂടുതൽ സമയം ലഭിക്കുമ്പോൾ അവർ പഠനത്തിലും സൃഷ്ടികളിലും ശ്രദ്ധ കേന്ദ്രീകരിക്കും,” എന്നാണ് അദ്ദേഹത്തിന്റെ വാദം.
“ജയിൽ വേണ്ട, ഒപ്റ്റിമസ് മതി!”
മസ്ക് കാണുന്ന ഭാവിയിലേയ്ക്ക് നോക്കുമ്പോൾ, കുറ്റവാളികളെയും ജയിലിൽ അടയ്ക്കേണ്ട കാര്യമില്ല. അവരുടെ കൂടെ ഒരു ഒപ്റ്റിമസിനെ അയച്ചാൽ മതി! അത്രയേറെ റോബോട്ടിക് സഹവർത്തിത്വമുള്ള സമൂഹം അദ്ദേഹം കണക്കാക്കുകയാണ്.
“മസ്ക് തന്നെ ഒരു ജിപിയു”
നിവിഡിയയുടെ മേധാവി ജെൻസൺ ഹൗങ്, മസ്കിനെ “ലോകത്തിലെ ഏറ്റവും ശക്തമായ ജിപിയു”യോട് ഉപമിച്ചു.
“റോബോട്ടിക്സ് മുതൽ എഐ വരെയും, ബഹിരാകാശ ദൗത്യങ്ങളിൽ നിന്ന് സോഷ്യൽ മീഡിയ പ്ലാറ്റ്ഫോം വരെയും, ഒറ്റമനുഷ്യൻ ഇത്രയധികം സങ്കീർണ്ണ മേഖലകളിൽ ശ്രദ്ധ കേന്ദ്രീകരിക്കുന്നതെന്നത് അതുല്യമാണ്,” എന്നാണ് ജെൻസന്റെ വിലയിരുത്തൽ.
കൊളോസസ് II: മസ്കിന്റെ അടുത്ത വമ്പൻ നീക്കം
മസ്ക് ഇപ്പോൾ ആരംഭിച്ച “കൊളോസസ് II” പ്രോജക്റ്റ്, ലോകത്തിലെ ആദ്യത്തെ ഗിഗാവാട്ട് എഐ ട്രെയിനിങ് ക്ലസ്റ്റർ ആണെന്ന് പറയപ്പെടുന്നു. അദ്ദേഹത്തിന്റെ എക്സ്എഐ (xAI) കമ്പനിയാണ് ഇതിന് പിന്നിൽ. ഇതിനായി ഇതുവരെ 400 ദശലക്ഷം ഡോളർ മുടക്കുകയും, 200,000 നിവിഡിയ ജിപിയുകൾ ഉൾപ്പെടുത്തുകയും ചെയ്തിട്ടുണ്ട്.
ഭാവിയുടെ സ്വപ്നക്കാരൻ
വിമർശനങ്ങൾ എത്രയുണ്ടായാലും മസ്ക് സ്വപ്നം കാണുന്നത് നിർത്തുന്നില്ല.അദ്ദേഹത്തിന്റെ ആരാധകർ പറയുന്നത് പോലെ, “ഉള്ളതുപോലെ ഇരിക്കാം എന്ന മനോഭാവം പുരോഗതിയെ നശിപ്പിക്കും; ഭ്രാന്തൻ സ്വപ്നങ്ങൾ കാണുന്നവരാണ് ലോകത്തെ മുന്നോട്ടു നീക്കുന്നത്.”
