ലുലു ഗ്രൂപ്പിന്റെ പുതിയ ഭക്ഷ്യസംസ്കരണ–ലോജിസ്റ്റിക്സ് കേന്ദ്രം തായ്ലൻഡിലെ ബാങ്കോക്കിൽ ഉദ്ഘാടനം ചെയ്തു. തെക്കുകിഴക്കൻ ഏഷ്യയിൽ സാന്നിധ്യം കൂടുതൽ ശക്തമാക്കുന്നതിന്റെ ഭാഗമായാണ് ഈ പുതിയ സംരംഭം. ലുലു ഗ്രൂപ്പിന്റെ അനുബന്ധ സ്ഥാപനമായ മെയ് എക്സ്പോർട്ടിന്റെ പ്രാദേശിക ഓഫിസും ലോജിസ്റ്റിക്സ് കേന്ദ്രവും തായ്ലൻഡ് വാണിജ്യമന്ത്രി സുഫാജി സുതുമ്പുൻ ഔദ്യോഗികമായി ഉദ്ഘാടനം ചെയ്തു.
ഉദ്ഘാടന ചടങ്ങിൽ വാണിജ്യ ഉപമന്ത്രി ഡോ. കിരിദ പാവോചിത്, വാണിജ്യ മന്ത്രാലയ ഡയറക്ടർ ജനറൽ സുനന്ത കാങ്വൽകുൽക്കി, തായ്ലൻഡിലെ യുഎഇ എംബസി ചാർജ് ഡി അഫയേഴ്സ് സൗദ് ഇബ്രാഹിം അൽ തുനൈജി, തായ്ലൻഡ് എക്സിം ബാങ്ക് പ്രസിഡന്റ് ചരത് രത്തനബൂനിറ്റി, ലുലു ഗ്രൂപ്പ് ചെയർമാൻ എം.എ. യൂസഫലി, ലുലു തായ്ലൻഡ് ഡയറക്ടർ സയ്യിദ് അബ്ദുൽ അനീസ് എന്നിവരും പങ്കെടുത്തു.
തായ്ലൻഡ് ഉൽപന്നങ്ങൾക്ക് ലുലു ഗ്രൂപ്പ് ആഗോള വിപണി ഒരുക്കുന്നുവെന്നും, ഗൾഫ് രാജ്യങ്ങളിൽ തായ് ഉൽപന്നങ്ങൾക്ക് വലിയ സ്വീകാര്യത ലഭിക്കുന്നുണ്ടെന്നും വാണിജ്യമന്ത്രി സുഫാജി സുതുമ്പുൻ പറഞ്ഞു. ലുലു ഗ്രൂപ്പിന് തായ്ലൻഡിൽ എല്ലാ വിധ പിന്തുണയും നൽകുമെന്ന് അദ്ദേഹം ഉറപ്പ് നൽകി.കഴിഞ്ഞ 27 വർഷമായി ലുലു ഗ്രൂപ്പ് തായ്ലൻഡിലെ വാണിജ്യ രംഗത്ത് സജീവമാണെന്ന് ചെയർമാൻ എം.എ. യൂസഫലി പറഞ്ഞു. പുതിയ ഭക്ഷ്യസംസ്കരണ–ലോജിസ്റ്റിക്സ് കേന്ദ്രം തായ് കർഷകർക്ക് വലിയ ഗുണം ചെയ്യുമെന്നും അദ്ദേഹം വ്യക്തമാക്കി. നിലവിൽ അരി, പഴങ്ങൾ, പച്ചക്കറികൾ, വസ്ത്രങ്ങൾ, സ്റ്റേഷനറി എന്നിവ ഉൾപ്പെടെ 4,000ലേറെ ഉൽപന്നങ്ങളാണ് ലുലു തായ്ലൻഡിൽ നിന്ന് വിവിധ രാജ്യങ്ങളിലേക്ക് കയറ്റുമതി ചെയ്യുന്നത്.
