പ്രതീക്ഷകളെ കവച്ച് 2025-26 സാമ്പത്തിക വർഷത്തിൽ ഇന്ത്യയുടെ സമ്പദ്വ്യവസ്ഥ ശക്തമായ വളർച്ച കൈവരിച്ചു. കേന്ദ്ര സ്റ്റാറ്റിസ്റ്റിക്സ് മന്ത്രാലയം പുറത്തുവിട്ട കണക്കുകൾ പ്രകാരം രാജ്യത്തിന്റെ മൊത്ത ആഭ്യന്തര ഉൽപാദന (ജിഡിപി) വളർച്ച 7.7 ശതമാനമാണ്. മുൻ സാമ്പത്തിക വർഷത്തിൽ ഇത് 7.1 ശതമാനമായിരുന്നു.
കേന്ദ്ര സർക്കാരും റിസർവ് ബാങ്കും മുന്നോട്ടുവെച്ചിരുന്ന 7.6 ശതമാനം വളർച്ചാ പ്രവചനത്തെയും ഇന്ത്യ മറികടന്നു. 2023-24ൽ രേഖപ്പെടുത്തിയ 7.2 ശതമാനം വളർച്ചയേക്കാളും മികച്ച പ്രകടനമാണ് കഴിഞ്ഞ വർഷം രാജ്യം കാഴ്ചവെച്ചത്.
ജിഡിപി മൂല്യത്തിൽ വൻ വർധന
2024-25 സാമ്പത്തിക വർഷത്തിലെ 299.89 ലക്ഷം കോടി രൂപയിൽ നിന്ന് 2025-26ൽ ഇന്ത്യയുടെ ജിഡിപി മൂല്യം 323.12 ലക്ഷം കോടി രൂപയായി ഉയർന്നു. ഉൽപന്നങ്ങളുടെയും സേവനങ്ങളുടെയും ആകെ മൂല്യത്തിൽ ഉണ്ടായ ഈ വർധനയാണ് 7.7 ശതമാനം വളർച്ചയ്ക്ക് അടിസ്ഥാനം.ഒരു നിശ്ചിത കാലയളവിൽ രാജ്യത്ത് ഉൽപാദിപ്പിക്കുകയും വിതരണം ചെയ്യുകയും ചെയ്യുന്ന എല്ലാ ഉൽപന്നങ്ങളുടെയും സേവനങ്ങളുടെയും ആകെ മൂല്യമാണ് ജിഡിപി. ഒരു രാജ്യത്തിന്റെ സാമ്പത്തിക ആരോഗ്യത്തിന്റെ പ്രധാന സൂചികയായാണ് ഇത് കണക്കാക്കപ്പെടുന്നത്.
മേഖലാ അടിസ്ഥാനത്തിൽ സമ്മിശ്ര ചിത്രം
രാജ്യത്തിന്റെ വളർച്ച ശക്തമായിരുന്നെങ്കിലും ചില പ്രധാന മേഖലകളിൽ പ്രകടനം മന്ദഗതിയിലായിരുന്നു.
കാർഷിക മേഖലയിലെ വളർച്ച 4.2 ശതമാനത്തിൽ നിന്ന് 3 ശതമാനമായി കുറഞ്ഞു.ഖനന മേഖലയിലെ വളർച്ച 11.7 ശതമാനത്തിൽ നിന്ന് 5.2 ശതമാനമായി ഇടിഞ്ഞു.വൈദ്യുതി, ഗ്യാസ്, ജലവിതരണം തുടങ്ങിയ സേവനങ്ങളുടെ വളർച്ച 2.9 ശതമാനത്തിൽ നിന്ന് 1.7 ശതമാനമായി കുറഞ്ഞു.
അതേസമയം ചില മേഖലകൾ മികച്ച മുന്നേറ്റം കാഴ്ചവെച്ചു.
മാനുഫാക്ചറിങ് മേഖലയുടെ വളർച്ച 9.3 ശതമാനത്തിൽ നിന്ന് 10.7 ശതമാനമായി ഉയർന്നു.
നിർമാണ മേഖല 7.3 ശതമാനത്തിൽ നിന്ന് 7.4 ശതമാനമായി മെച്ചപ്പെട്ടു.
വ്യാപാരം, ഹോട്ടൽ, ഗതാഗതം എന്നിവ ഉൾപ്പെടുന്ന മേഖല 6.6 ശതമാനത്തിൽ നിന്ന് 11 ശതമാനമായി കുതിച്ചു.
സേവന മേഖലയും ശക്തമായി.ധനകാര്യം, റിയൽ എസ്റ്റേറ്റ്, ഐടി, പ്രൊഫഷണൽ സേവനങ്ങൾ എന്നിവ ഉൾപ്പെടുന്ന മേഖലയുടെ വളർച്ച 10 ശതമാനത്തിൽ നിന്ന് 10.4 ശതമാനമായി ഉയർന്നു.
പൊതുഭരണം, പ്രതിരോധം, മറ്റ് സർക്കാർ സേവനങ്ങൾ എന്നിവ ഉൾപ്പെടുന്ന വിഭാഗത്തിന്റെ വളർച്ച 5 ശതമാനത്തിൽ തന്നെ തുടരുകയും ചെയ്തു.
നാലാം പാദത്തിലും ശക്തമായ പ്രകടനം
2025-26 സാമ്പത്തിക വർഷത്തിന്റെ നാലാം പാദമായ ജനുവരി-മാർച്ച് കാലയളവിലും ഇന്ത്യ ശക്തമായ വളർച്ച രേഖപ്പെടുത്തി. ഈ കാലയളവിലെ ജിഡിപി വളർച്ച 7.8 ശതമാനമാണ്.മുൻ വർഷത്തെ സമാന പാദത്തിൽ 81.40 ലക്ഷം കോടി രൂപയായിരുന്ന ജിഡിപി മൂല്യം 87.77 ലക്ഷം കോടി രൂപയായി ഉയർന്നു.ഈ പാദത്തിലും കാർഷിക, ഖനന മേഖലകൾ സമ്മർദം നേരിട്ടെങ്കിലും സമ്പദ്വ്യവസ്ഥയുടെ മൊത്തത്തിലുള്ള പ്രകടനം ശക്തമായി തുടരുകയായിരുന്നു.
ലോകത്തെ അതിവേഗ വളർച്ചയുള്ള വലിയ സമ്പദ്വ്യവസ്ഥ
നാലാം പാദത്തിലും ഇന്ത്യ ലോകത്തിലെ ഏറ്റവും വേഗത്തിൽ വളരുന്ന പ്രധാന സമ്പദ്വ്യവസ്ഥ എന്ന സ്ഥാനം നിലനിർത്തി. പ്രമുഖ സാമ്പത്തിക വിദഗ്ധരും ധനകാര്യ സ്ഥാപനങ്ങളും 6.7 മുതൽ 7.4 ശതമാനം വരെ മാത്രമായിരിക്കും വളർച്ചയെന്നാണ് വിലയിരുത്തിയിരുന്നത്. എന്നാൽ ആ പ്രവചനങ്ങളെയെല്ലാം മറികടന്ന് ഇന്ത്യ 7.8 ശതമാനം വളർച്ച കൈവരിച്ചു.
ആഗോള സാമ്പത്തിക അനിശ്ചിതത്വങ്ങളും വ്യാപാര വെല്ലുവിളികളും നിലനിൽക്കുന്ന സാഹചര്യത്തിൽ ഇന്ത്യയുടെ ഈ പ്രകടനം രാജ്യത്തിന്റെ ആഭ്യന്തര ആവശ്യകത, സേവന മേഖലയുടെ ശക്തി, നിർമ്മാണ രംഗത്തെ വളർച്ച എന്നിവയുടെ പ്രതിഫലനമായാണ് സാമ്പത്തിക വിദഗ്ധർ വിലയിരുത്തുന്നത്.
