എസ്എംഎസ് അലർട്ട് സേവനത്തിന് ബാങ്കുകൾ ഇടപാടുകാരിൽ നിന്നു ചാർജ് ഈടാക്കുന്നതു പ്രതിമാസം നിശ്ചയിച്ചിട്ടുള്ള നിരക്കിലാണോ അതോ യഥാർഥ ഉപയോഗത്തിന്റെ അടിസ്ഥാനത്തിലാണോ എന്നറിയിക്കാൻ ഹൈക്കോടതി ബാങ്കുകൾക്കു നിർദേശം നൽകി.
യഥാർഥ ഉപയോഗത്തിന്റെ അടിസ്ഥാനത്തിൽ ചാർജ് ഈടാക്കണമെന്ന് ആവശ്യപ്പെട്ട് ഡൽഹി ആസ്ഥാനമായുള്ള ബാങ്ക് ആൻഡ് ഫിനാൻസ് അക്കൗണ്ട് ഹോൾഡേഴ്സ് വെൽഫെയർ അസോസിയേഷൻ നൽകിയ ഹർജിയിലാണു ഡിവിഷൻ ബെഞ്ചിന്റെ ഉത്തരവ്. കേസിൽ എതിർകക്ഷികളായ മുൻനിര ബാങ്കുകൾക്കാണു നിർദേശം.
ബാങ്കുകൾക്കു നൽകിയിട്ടുള്ള നിർദേശത്തിന്റെ വിശദാംശങ്ങൾ റിസർവ് ബാങ്ക് അറിയിക്കണമെന്നും കോടതി നിർദേശിച്ചു. സേവനത്തിന് ബാങ്കുകൾ ഈടാക്കിയ ചാർജിന്റെ വിശദാംശങ്ങൾ റിസർവ് ബാങ്ക് സമാഹരിക്കണമെന്നും നിർദേശിച്ചു.
