ആഴ്ചയിൽ അഞ്ച് പ്രവൃത്തി ദിവസമാക്കി ബാങ്ക് പ്രവർത്തനം ക്രമീകരിക്കണമെന്ന ശുപാർശ രണ്ട് വർഷമായിട്ടും നടപ്പാക്കാത്തതിൽ പ്രതിഷേധിച്ച് ഈ മാസം 27ന് രാജ്യവ്യാപകമായി ബാങ്ക് ജീവനക്കാർ പണിമുടക്കും. ബാങ്ക് യൂണിയനുകളുടെ സംയുക്ത സംഘടനയായ യുണൈറ്റഡ് ഫോറം ഓഫ് ബാങ്ക് യൂണിയൻസ് (യുഎഫ്ബിയു) ആണ് പണിമുടക്കിന് ആഹ്വാനം ചെയ്തത്.
27ന് പണിമുടക്ക് നടപ്പായാൽ, റിപ്പബ്ലിക് ദിന അവധിയും തുടർന്ന് ശനി–ഞായർ അവധികളും ചേർന്ന് ഈ മാസം 24 മുതൽ 27 വരെ തുടർച്ചയായി നാല് ദിവസം ബാങ്കുകൾ തുറക്കില്ല. ഇതോടെ സാധാരണ ബാങ്കിംഗ് സേവനങ്ങൾ ഗൗരവമായി ബാധിക്കപ്പെടാനാണ് സാധ്യത.
ബാങ്ക് ജീവനക്കാരുടെ വിവിധ ആവശ്യങ്ങൾ ഉന്നയിച്ചുള്ള സമരത്തിൽ ബെഫി, എഐബിഇഎ, എഐബിഒസി, എൻസിബിഇ എന്നിവ ഉൾപ്പെടെ രാജ്യത്തെ ഒൻപത് ബാങ്ക് യൂണിയനുകൾ അംഗമായ യുഎഫ്ബിയു പങ്കുചേരുന്നുണ്ട്.