കേരളത്തിലെ അടിസ്ഥാന സൗകര്യ വികസനത്തിൽ പുതിയ ദിശകൾ തുറന്ന് കാട്ടുകയാണ് കിഫ്ബി പദ്ധതികൾ. അതിൽ ശ്രദ്ധേയമായ മുന്നേറ്റമാണ് ആലപ്പുഴ ജില്ലയിൽ ഉയർന്ന് വരുന്ന പുതിയ പാലങ്ങൾ. സംസ്ഥാനത്തിന്റെ ആദ്യ ഇരുനില പാലം ഉൾപ്പെടെ നിരവധി വ്യത്യസ്ത രൂപകൽപ്പനകളിലുള്ള പാലങ്ങൾ ജില്ലയുടെ ഗതാഗത സൗകര്യങ്ങൾക്ക് വലിയ മാറ്റം സൃഷ്ടിക്കുകയാണ്.
ആലപ്പുഴയിലെ തോട്ടപ്പള്ളിയിൽ നിർമ്മിച്ച തോട്ടപ്പള്ളി–നാലുചിറ പാലം പ്രത്യേക ശ്രദ്ധ നേടുന്ന ഒന്നാണ്. പക്ഷിച്ചിറകിന്റെ മാതൃകയിൽ രൂപകൽപ്പന ചെയ്തിരിക്കുന്ന ഈ പാലം കേരളത്തിലെ ആദ്യ എക്സ്ട്രാഡോസ്ഡ് പാലം എന്ന പ്രത്യേകതയും സ്വന്തമാക്കുന്നു. ദേശീയ ജലപാതയ്ക്ക് കുറുകെയായി നിർമിച്ചതിനാൽ പാലത്തിന്റെ നടുവിൽ തൂണുകളില്ലെന്നതാണ് മറ്റൊരു പ്രത്യേകത.
നാലുചിറയും ഇല്ലിച്ചിറയും ഉൾപ്പെടുന്ന പ്രദേശങ്ങളിലെ ജനങ്ങളുടെ വർഷങ്ങളായുള്ള യാത്രാക്ലേശത്തിന് ഈ പാലം വലിയ ആശ്വാസമായി മാറിയിട്ടുണ്ട്. കിഫ്ബിയുടെ സാമ്പത്തിക പിന്തുണയോടെ നിർമ്മിച്ച ഈ പാലത്തിന് ഏകദേശം 60.73 കോടി രൂപ ചെലവായി. അമ്പലപ്പുഴ–തിരുവല്ല സംസ്ഥാന പാതയെ ദേശീയപാത 66-നുമായി ബന്ധിപ്പിക്കുന്ന പ്രധാന പാലമായും ഇത് പ്രവർത്തിക്കുന്നു.
അതേസമയം, പമ്പയാറിന് കുറുകെ തകഴിയെയും നെടുമുടിയെയും ബന്ധിപ്പിക്കുന്ന പടഹാരം പാലം കേരളത്തിലെ ആദ്യ ഇരുനില പാലം എന്ന നേട്ടവും സ്വന്തമാക്കി. മുകളിലായി വാഹന ഗതാഗതത്തിനുള്ള റോഡും താഴെ നടപ്പാതയും ഉൾപ്പെടുന്ന രീതിയിലാണ് പാലത്തിന്റെ നിർമ്മാണം. ഏകദേശം അര കിലോമീറ്ററോളം നീളമുള്ള പാലത്തിൽ കേരളത്തിന്റെ പൈതൃക ശൈലി ഉൾക്കൊള്ളുന്ന വാച്ച് ടവറുകളും ഒരുക്കിയിട്ടുണ്ട്. ഇവിടങ്ങളിൽ നിന്ന് കുട്ടനാടിന്റെ മനോഹര ദൃശ്യങ്ങൾ ആസ്വദിക്കാനാവും.
കിഫ്ബി പദ്ധതികളുടെ ഭാഗമായി ആലപ്പുഴ ജില്ലയിൽ ചെറുതും വലുതുമായ നിരവധി പാലങ്ങളാണ് ഇതിനകം യാഥാർഥ്യമായത്. അതിനൊപ്പം പുതിയ പാലങ്ങളുടെ നിർമ്മാണവും വിവിധ സ്ഥലങ്ങളിൽ പുരോഗമിച്ചുകൊണ്ടിരിക്കുകയാണ്.
