ഓഹരി വിപണിയിൽ നിക്ഷേപം തുടങ്ങുമ്പോൾ ഏത് നിക്ഷേപകനും നേരിടുന്ന പ്രധാന ചോദ്യങ്ങൾ — എത്ര തുക നിക്ഷേപിക്കണം, എവിടെയാണ് സുരക്ഷിതം, എത്രകാലത്തേക്കാണ് നിക്ഷേപിക്കേണ്ടത് എന്നതുമാണ്. ഇതിന്റെ ഉത്തരം വ്യക്തി അടിസ്ഥാനത്തിൽ വ്യത്യാസപ്പെടുമെങ്കിലും, വിപണിയിൽ താരതമ്യേന റിസ്ക് കുറവായും സ്ഥിരതയുള്ളതുമായ നിക്ഷേപ മാർഗമായി ഇടിഎഫുകൾ (Exchange Traded Funds) ശ്രദ്ധ നേടുകയാണ്.
ഇടിഎഫ് എന്നത് എന്താണ്?
ഇടിഎഫ് എന്നത് ഒരു സൂചികയുടെ (Index) നീക്കങ്ങളെ അതേപടി പിന്തുടരുന്ന നിക്ഷേപ മാർഗമാണ്. ഉദാഹരണത്തിന്, നിഫ്റ്റി 50 സൂചികയെ അടിസ്ഥാനമാക്കിയുള്ള ഇടിഎഫ് എടുക്കുക — നിഫ്റ്റി ഉയർന്നാൽ അതേ അനുപാതത്തിൽ ഈ ഇടിഎഫും വളരും, താഴെയായാൽ അതേപോലെ കുറയും. അതായത്, വിപണിയുടെ സ്വാഭാവിക ചലനങ്ങളെ ‘മിറർ’ ചെയ്യുന്നതാണ് ഇടിഎഫ്.
ട്രാക്കിങ് എറർ & എക്സ്പെൻസ് റേഷ്യോ
സൂചികയോട് താരതമ്യേന 0.01% മുതൽ 1% വരെ വ്യത്യാസം ചിലപ്പോൾ ഉണ്ടാകാം — ഇതാണ് ട്രാക്കിങ് എറർ. ഇതിന് പ്രധാനമായ കാരണങ്ങൾ ഫണ്ട് മാനേജ്മെന്റ് ചെലവുകളാണ്. അതിനാൽ കുറഞ്ഞ എക്സ്പെൻസ് റേഷ്യോ (Expense Ratio) ഉള്ള ഇടിഎഫുകൾ തിരഞ്ഞെടുക്കുന്നതാണ് നല്ലത്. സാധാരണയായി 0.05% മുതൽ 0.40% വരെയുള്ള എക്സ്പെൻസ് റേഷ്യോ മികച്ചതായാണ് കണക്കാക്കപ്പെടുന്നത്.
സ്വർണനിക്ഷേപത്തിന് മികച്ച മാർഗം
സ്വർണനിക്ഷേപം ആഗ്രഹിക്കുന്നവർക്ക് ഗോൾഡ് ഇടിഎഫുകൾ ഏറ്റവും ലളിതമായയും സുരക്ഷിതമായും മാർഗമാണ്. ഒരു യൂണിറ്റ് ഗോൾഡ് ഇടിഎഫിന്റെ വില ഏകദേശം ₹12 മുതൽ ₹120 വരെ മാത്രമാണ്. അതായത് മാസം ₹1000 നിക്ഷേപിക്കുന്ന ഒരാൾക്ക് 8 മുതൽ 83 യൂണിറ്റുകൾ വരെ വാങ്ങാൻ കഴിയും. ഇത് ഭൗതിക സ്വർണത്തിലെ അപകടസാധ്യതകളില്ലാതെ സ്വർണത്തിന്റെ മൂല്യവർദ്ധനയിൽ പങ്കാളിയാകാനുള്ള മാർഗമാണ്.
ഇടിഎഫുകളുടെ തരം
നിക്ഷേപ ലക്ഷ്യവും റിസ്ക് സ്വീകരണ ശേഷിയും അനുസരിച്ച് ഇടിഎഫുകൾ തിരഞ്ഞെടുക്കാം:
ഓഹരി സൂചിക അടിസ്ഥാനമാക്കിയവ – നിഫ്റ്റി 50, മിഡ്ക്യാപ് നിഫ്റ്റി, സ്മോൾക്യാപ് നിഫ്റ്റി തുടങ്ങിയവ.
തീമാറ്റിക് ഇടിഎഫുകൾ – ബാങ്കിങ്, ഐടി, ഫാർമ തുടങ്ങിയ മേഖലകളിൽ മാത്രം നിക്ഷേപിക്കുന്ന ഫണ്ടുകൾ.
ഗോൾഡ് / സിൽവർ ഇടിഎഫുകൾ – ഇലക്ട്രോണിക് സ്വർണത്തിലും വെള്ളിയിലും നിക്ഷേപം.
ബോണ്ട് / ഡെറ്റ് ഇടിഎഫുകൾ – സർക്കാർ, കോർപ്പറേറ്റ് ബോണ്ടുകൾ എന്നിവയിൽ നിക്ഷേപം.
ഇന്റർനാഷണൽ ഇടിഎഫുകൾ – വിദേശ വിപണികളിലെ സൂചികകളിൽ നിന്നുകൊണ്ട് ഇന്ത്യയിൽ നിന്ന് നിക്ഷേപിക്കാൻ കഴിയുന്ന ഫണ്ടുകൾ.
ഇടിഎഫ് തിരഞ്ഞെടുക്കുമ്പോൾ ശ്രദ്ധിക്കേണ്ട കാര്യങ്ങൾ
ഉയർന്ന ഇടപാട് വോളിയം ഉള്ള ഫണ്ടുകൾ തിരഞ്ഞെടുക്കുക. കുറഞ്ഞത് ₹500 കോടി AUM (Assets Under Management) ഉള്ള ഇടിഎഫുകൾ മികച്ചതാണ്.
കുറഞ്ഞ ട്രാക്കിങ് എറർ ഉള്ള ഫണ്ടുകൾക്കാണ് സാധാരണയായി നല്ല പ്രകടനം.
ലാഭകരമായ എക്സ്പെൻസ് റേഷ്യോ ഉറപ്പാക്കുക — അധിക ചെലവ് കുറയുമ്പോൾ നിക്ഷേപ ഫലപ്രാപ്തി വർധിക്കും.
നിക്ഷേപ തന്ത്രം
ഇടിഎഫുകൾ ദീർഘകാല നിക്ഷേപത്തിനാണ് ഏറ്റവും അനുയോജ്യം. ഒരു SIP (Systematic Investment Plan) പോലെ, ഓരോ മാസവും നിശ്ചിത തുക വ്യത്യസ്ത ഇടിഎഫുകളിൽ നിക്ഷേപിക്കുന്നത് മികച്ച തന്ത്രമാണ്. ഒറ്റത്തവണ നിക്ഷേപിക്കാനുള്ള സാധ്യതയും ഇവയിൽ ലഭ്യമാണ്.
ഇടിഎഫ് vs മ്യൂച്വൽ ഫണ്ട്
ഇടിഎഫിൽ നിക്ഷേപ തീരുമാനം നിക്ഷേപകൻ തന്നെയാണ് എടുക്കുന്നത്. മ്യൂച്വൽ ഫണ്ടിൽ അത് ഫണ്ട് മാനേജർ മുഖേനയാണ് നടക്കുന്നത്. അതിനാൽ ഇടിഎഫിന്റെ ലാഭം വിപണിയുടെ സൂചികയെ ആശ്രയിച്ചിരിക്കും, മ്യൂച്വൽ ഫണ്ടിന്റെ ലാഭം മാനേജറുടെ തീരുമാനങ്ങളെയും തന്ത്രങ്ങളെയും ആശ്രയിച്ചിരിക്കും. അതുകൊണ്ട് മ്യൂച്വൽ ഫണ്ടിന് ഇടിഎഫിനെക്കാൾ കൂടുതൽ അല്ലെങ്കിൽ കുറവായ റിട്ടേൺ ലഭിക്കാം.
വിപണിയിലെ സ്ഥിരതയും ദീർഘകാല വളർച്ചയും തേടുന്ന നിക്ഷേപകർക്ക് ഇടിഎഫുകൾ ബുദ്ധിപരമായ മാർഗമാണ്. കുറഞ്ഞ റിസ്ക്, നിയന്ത്രിത ചെലവ്, വിപണി അനുസരിച്ചുള്ള വളർച്ച — ഇതെല്ലാം ഇടിഎഫുകളെ പുതിയ തലമുറയുടെ നിക്ഷേപ ചോയ്സായി മാറ്റിയിരിക്കുന്നു.
Note-ഓഹരികളിലോ കടപ്പത്രങ്ങളിലോ മ്യൂച്വൽ ഫണ്ടുകളിലോ ചെയ്യുന്ന എല്ലാ നിക്ഷേപങ്ങളും വിപണിയിലെ മാറ്റങ്ങൾക്കും റിസ്കുകൾക്കും വിധേയമാണ്. അതിനാൽ നിക്ഷേപ തീരുമാനം എടുക്കുന്നതിന് മുമ്പ് സ്വതന്ത്രമായ പഠനങ്ങൾ നടത്തുകയോ, യോഗ്യരായ സാമ്പത്തിക വിദഗ്ധരിൽ നിന്ന് ഉപദേശം തേടുകയോ ചെയ്യുന്നത് ഉചിതമാണ്
