സാമ്പത്തിക വളർച്ചയും ശക്തമായ സൈനിക ശേഷിയും പിന്നൊരുക്കമായി, ഏഷ്യ പവർ ഇൻഡക്സ് 2025-ൽ ഇന്ത്യ മൂന്നാം സ്ഥാനത്തെത്തി. ഏഷ്യ–പസഫിക് മേഖലയിലെ സാമ്പത്തിക, സൈനിക, നയതന്ത്ര, തന്ത്രപ്രധാന സ്വാധീനങ്ങൾ അടിസ്ഥാനമാക്കി രാജ്യങ്ങളെയാണ് ഓസ്ട്രേലിയ ആസ്ഥാനമായ ലോവി ഇൻസ്റ്റിറ്റ്യൂട്ട് വിലയിരുത്തുന്നത്.
2025ലെ കണക്കുകൾ പ്രകാരം മുൻനിരയിൽ യുഎസ്, ചൈന, ഇന്ത്യ, ജപ്പാൻ, റഷ്യ എന്നിവയാണ്. ഇന്ത്യയുടെ സ്കോർ 0.9 പോയിന്റ് ഉയർന്ന് 40 ആയി. ഇതോടെ ജപ്പാനെ മറികടന്ന് ഇന്ത്യയ്ക്ക് ചെറിയ പക്ഷേ നിർണായകമായ മുന്നേറ്റം കൈവരിച്ചു. ഇന്ത്യയ്ക്ക് മുന്നിൽ യുഎസ് (80.4), ചൈന (73.5) എന്നീ രാജ്യങ്ങളാണ്.
സൈനിക ശേഷി, സാമ്പത്തിക സ്വാധീനം, വ്യാപാര ബന്ധങ്ങൾ, സാങ്കേതിക മുന്നേറ്റങ്ങൾ തുടങ്ങി വിവിധ മേഖലകളിൽ ഇന്ത്യ ശക്തമായി വളർന്നുകൊണ്ടിരിക്കുകയാണെന്ന് റിപ്പോർട്ട് വ്യക്തമാക്കുന്നു.
ഓപ്പറേഷൻ സിന്ദൂർ ഇന്ത്യയുടെ സൈനിക ശക്തിയും നയതന്ത്ര കഴിവുകളും തെളിയിച്ചുവെന്ന് ലോവി ഇൻസ്റ്റിറ്റ്യൂട്ട് വിലയിരുത്തുന്നു. വിദേശ സഞ്ചാരികളുടെ ഇന്ത്യയിലേക്കുള്ള വരവ് വർധിച്ചതും രാജ്യത്തിന്റെ ടൂറിസം മേഖല മെച്ചപ്പെടുത്താനും ഏഷ്യയിൽ ഇന്ത്യയുടെ സാന്നിധ്യം ശക്തിപ്പെടുത്താനും സഹായകമായതായി റിപ്പോർട്ട് ചൂണ്ടിക്കാട്ടുന്നു.
ഇന്ത്യ–ചൈന ബന്ധത്തിൽ ഘടനാപരമായ അകൽച്ച വർധിച്ചുവരുന്നുവെന്നും ചൈന തന്റെ സൈനിക ശേഷി ഉപയോഗിച്ച് യുഎസിന്റെ മുൻതൂക്കം കുറയ്ക്കുന്നുവെന്നും റിപ്പോർട്ടിൽ പറയുന്നു.
