യാത്രികരുടെ സുരക്ഷ ശക്തിപ്പെടുത്തുന്നതിനായി ഭാരത് എൻസിഎപി ക്രാഷ് ടെസ്റ്റ് മാനദണ്ഡങ്ങൾ വലിയ മാറ്റങ്ങളോടെ പുതുക്കുന്നു. റോഡ് ഗതാഗത മന്ത്രാലയം ആരംഭിച്ച ഈ അടുത്ത ഘട്ടത്തെ ഭാരത് എൻസിഎപി 2.0 എന്ന് പരിചയപ്പെടുത്തുന്നു. നിലവിലുള്ള കുട്ടി–വയസ്സ്ക്കാർ സുരക്ഷാ മാനദണ്ഡങ്ങളെക്കാൾ ഏറെ ഉയർന്ന സ്റ്റാൻഡേർഡുകളാണ് പുതിയ പതിപ്പിൽ വരുന്നത്.
ഭാരത് എൻസിഎപി 2.0 — അഞ്ച് പ്രധാന വിഭാഗങ്ങളിലെ കർശന വിലയിരുത്തൽ
പുതിയ മാനദണ്ഡങ്ങൾ പ്രകാരം വാഹനത്തിന്റെ സുരക്ഷാ സ്കോർ അഞ്ചു വിഭാഗങ്ങളായി വിഭജിക്കും:
• ക്രാഷ് പ്രൊട്ടക്ഷൻ – 55%
• റോഡ് യാത്രികരുടെ സുരക്ഷ – 20%
• സുരക്ഷിത ഡ്രൈവിംഗ് – 10%
• അപകടം ഒഴിവാക്കൽ – 10%
• ഇടിക്ക് ശേഷമുള്ള സുരക്ഷ – 5%
2027 മുതൽ 5-സ്റ്റാർ റേറ്റിംഗ് നേടാൻ കുറഞ്ഞത് 70 പോയിന്റും 2029-31 കാലത്ത് കുറഞ്ഞത് 80 പോയിന്റും നിർബന്ധമാകും. ഓരോ വിഭാഗത്തിനും കുറഞ്ഞ പോയിന്റ് മാനദണ്ഡവും ഉണ്ടാകും.
ഇലക്ട്രോണിക് സ്റ്റാബിലിറ്റി കൺട്രോൾ (ESC), കർട്ടൻ എയർബാഗുകൾ എന്നിവ സ്റ്റാർ റേറ്റിംഗിനായി നിർബന്ധമാകും. ഓട്ടോണമസ് എമർജൻസി ബ്രേക്കിംഗ് (AEB) ഓപ്ഷണൽ. വശസീറ്റുകളുള്ള മോഡലുകൾ റേറ്റിംഗിൽ നിന്ന് ഒഴിവാക്കും.
ക്രാഷ് ടെസ്റ്റ്: ഇനി അഞ്ച് അതികഠിന ഇടി പരീക്ഷകൾ
വാഹനത്തിന്റെ ബേസ് വേരിയന്റിലാണ് പരീക്ഷണം നടക്കുക. യഥാർത്ഥ അപകടസാഹചര്യങ്ങൾ പുനരാവർത്തിക്കുന്ന അഞ്ച് പ്രധാന ഇടി പരീക്ഷകൾ:
മുന്നിലെ ഒരു ഭാഗം മണിക്കൂറില് 64 കിലോമീറ്റര് വേഗത്തില് ഇടിപ്പിക്കും.
മുന് ഭാഗം പൂര്ണമായും മണിക്കൂറില് 50 കിലോമീറ്റര് വേഗത്തില് ഇടിപ്പിക്കും.
മറ്റേതെങ്കിലും വാഹനമോ വസ്തുവോ വാഹനത്തിന്റെ വശങ്ങളില് ഇടിച്ചാലുള്ള സുരക്ഷ പരിശോധിക്കാന് മണിക്കൂറില് 50 കിലോമീറ്റര് വേഗത്തില് ഇടിപ്പിക്കും.
മണിക്കൂറില് 32 കിലോമീറ്റര് വേഗതയില് ഇടിപ്പിച്ചാണ് ഇരുമ്പ് തൂണ് പോലുള്ളവയില് ഇടിച്ചാലുള്ള ആഘാതം പരീക്ഷിക്കുക
പിന്നിലെ ഇടിയുടെ സുരക്ഷ പരിശോധിക്കാന് മണിക്കൂറില് 50 കിലോമീറ്റര് വേഗത്തില് ഇടിപ്പിക്കുകയും ചെയ്യും.
എപ്പോൾ നിലവിൽ വരും?
ഭാരത് എൻസിഎപി 2.0യുടെ കരട് നയം പുറത്തിറക്കിയിട്ടുണ്ട്; ഡിസംബർ 20 വരെ അഭിപ്രായങ്ങൾ സ്വീകരിക്കും. അന്തിമ പരിഷ്കരണങ്ങൾക്ക് ശേഷം 2027 ഒക്ടോബറിൽ ഇത് പ്രാബല്യത്തിൽ വരും. നിലവിലെ ഭാരത് എൻസിഎപി മാനദണ്ഡങ്ങളുടെ കാലാവധി 2027 സെപ്തംബറിൽ അവസാനിക്കും.
പുതിയ സ്റ്റാൻഡേർഡുകൾ നടപ്പായാൽ, ഇന്ത്യൻ റോഡുകളിൽ കൂടുതൽ സുരക്ഷിതമായ വാഹനങ്ങളാണ് പ്രതീക്ഷിക്കാനാകൂ.
