വനിത കൂട്ടായ്മകൾ, കുടുംബശ്രീ യൂണിറ്റുകൾ, വനിത സഹകരണസംഘങ്ങൾ എന്നിവയിലെ അംഗങ്ങൾക്ക് പ്രത്യേക ഗ്രൂപ്പ് ഇൻഷുറൻസ് പദ്ധതി അവതരിപ്പിച്ച് പൊതുമേഖല ഇൻഷുറൻസ് സ്ഥാപനമായ നാഷണൽ ഇൻഷുറൻസ്. വളരെ കുറഞ്ഞ പ്രീമിയത്തിൽ നിരവധി അപകടസാധ്യതകൾ ഉൾപ്പെടുത്തി വനിതകൾക്ക് സാമ്പത്തിക സുരക്ഷ ഉറപ്പാക്കുന്നതാണ് ഈ പാക്കേജ് പോളിസിയുടെ ലക്ഷ്യം.
18 മുതൽ 75 വയസ്സ് വരെയുള്ള വനിതകൾക്ക് ഈ ഇൻഷുറൻസ് പദ്ധതിയിൽ അംഗമാകാൻ കഴിയും. വർഷത്തിൽ 460 രൂപ പ്രീമിയം അടച്ചാൽ 9 തരത്തിലുള്ള അപകടസാധ്യതകൾക്ക് ഇൻഷുറൻസ് പരിരക്ഷ ലഭിക്കും.ഈ പോളിസിയിൽ അപകടമരണം, സ്ഥിരവും പൂർണ്ണവുമായ വൈകല്യം, ഭാഗിക വൈകല്യം എന്നിവയ്ക്ക് നഷ്ടപരിഹാരം ലഭിക്കും. കൂടാതെ 11 തരം ഗുരുതര രോഗങ്ങളുടെ ചികിത്സയ്ക്കും സാമ്പത്തിക സഹായം ഉൾപ്പെടുത്തിയിട്ടുണ്ട്.
അതിനു പുറമേ,
അപകടത്തെ തുടർന്ന് ആശുപത്രിയിൽ പ്രവേശിപ്പിക്കപ്പെട്ടാൽ പ്രതിദിന ബത്ത
അപകടം മൂലം ജോലി ചെയ്യാൻ കഴിയാത്ത സാഹചര്യത്തിൽ ആഴ്ചവേതന അലവൻസ്
ആംബുലൻസ് ചെലവ്
കുട്ടികളുടെ വിദ്യാഭ്യാസ ചെലവിന് സഹായം
എന്നിവയും ഈ ഇൻഷുറൻസ് പദ്ധതിയുടെ ഭാഗമാണ്.
വനിതയെ ഇൻഷുർ ചെയ്തിരിക്കുന്ന സാഹചര്യത്തിൽ, അവരുടെ ഭർത്താവിന് അപകടമരണം സംഭവിച്ചാലും ഈ പോളിസിയിൽ ക്ലെയിം ലഭിക്കുന്നതും പ്രത്യേകതയാണ്.ഇത് ഗ്രൂപ്പ് പോളിസിയായതിനാൽ വ്യക്തിഗത അപേക്ഷ സമർപ്പിക്കേണ്ടതില്ല. ഇൻഷുറൻസിന് അപേക്ഷിക്കുമ്പോൾ പേര്, വയസ്, വിലാസം, ജോലി തുടങ്ങിയ വിവരങ്ങളോടൊപ്പം ഭർത്താവിന്റെ പേര്, വയസ്, തൊഴിൽ, ആധാർ നമ്പർ എന്നിവ നൽകണം. ഗ്രൂപ്പായി ഇൻഷുർ ചെയ്യുമ്പോൾ ഗ്രൂപ്പിന്റെ വിലാസവും അനുബന്ധ രേഖകളും സമർപ്പിക്കേണ്ടതുണ്ട്.
സമൂഹത്തിലെ പാവപ്പെട്ടവർക്കും ഇടത്തരം വരുമാനക്കാർക്കും അനുകൂലമായ ഈ പദ്ധതി കുറഞ്ഞ ചെലവിൽ കൂടുതൽ സുരക്ഷ ഉറപ്പാക്കുന്ന ഒരു സാമൂഹ്യ സുരക്ഷാ ഇൻഷുറൻസ് പദ്ധതിയായി വിലയിരുത്തപ്പെടുന്നു.
