സ്മാർട്ട് ഗ്ലാസ് വിപണിയിൽ വലിയ തരംഗമുണ്ടാക്കി റേബാൻ മെറ്റ (Gen 2) എഐ സ്മാർട്ട് ഗ്ലാസ് ഇന്ത്യയിൽ ഔദ്യോഗികമായി പുറത്തിറങ്ങി. മികച്ച വീഡിയോ ക്ലാരിറ്റി, ഇരട്ടി ബാറ്ററി ലൈഫ്, അത്യാധുനിക എഐ ഫീച്ചറുകൾ എന്നിവയോടെയാണ് പുതിയ പതിപ്പ് എത്തുന്നത്. 39,900 രൂപയാണ് പ്രാരംഭ വില. ഇന്ത്യയിലെ റേബാൻ സ്റ്റോറുകളിലും പ്രമുഖ ഒപ്റ്റിക്കൽ ഷോപ്പുകളിലും ഡിസംബർ 2 മുതൽ ഗ്ലാസ് ലഭ്യമാകും.
ദീപിക പദുക്കോണിന്റെ ശബ്ദത്തിൽ മെറ്റ എഐ
മെറ്റ എഐയുമായി സംവദിക്കാൻ ഇനി ബോളിവുഡ് താരം ദീപിക പദുക്കോണിന്റെ ശബ്ദവും തിരഞ്ഞെടുക്കാം. ‘ഹേ മെറ്റ’ എന്ന് വിളിച്ച് ചോദ്യങ്ങൾ ചോദിക്കാം, പാട്ടുകൾ കേൾക്കാം, മെസേജുകൾ അയയ്ക്കാം.
കണ്ണുകൊണ്ട് തന്നെ പണമടയ്ക്കാം
ഗ്ലാസിൽ യുപിഐ ലൈറ്റ് പേയ്മെന്റ് സംവിധാനം പരീക്ഷിക്കുന്നുണ്ട്. ക്യുആർ കോഡിലേക്ക് നോക്കി “ഹേ മെറ്റ, സ്കാൻ ആൻഡ് പേ” എന്ന് പറഞ്ഞാൽ പേയ്മെന്റ് പൂർത്തിയാകും. ഫോൺ പുറത്തെടുക്കേണ്ടതില്ല. വാട്സാപ്പുമായി ബന്ധിപ്പിച്ച അക്കൗണ്ട് വഴിയാകും ഇടപാട്.
ഇരട്ടിയിലധികം ബാറ്ററി ലൈഫ്
മുൻ പതിപ്പിനെക്കാൾ ഗണ്യമായി ബാറ്ററി ലൈഫ് വർദ്ധിപ്പിച്ചിട്ടുണ്ട്.
• ഒറ്റ ചാർജിൽ 8 മണിക്കൂർ വരെ ഉപയോഗം
• 20 മിനിറ്റ് ചാർജിൽ 50% ബാറ്ററി
• ചാർജിംഗ് കേസ് ഉപയോഗിച്ചാൽ 48 മണിക്കൂർ വരെ ചാർജ് നിലനിൽക്കും
ശക്തമായ ക്യാമറ ഫീച്ചറുകൾ
3K അൾട്രാ എച്ച്ഡി വീഡിയോ റെക്കോർഡിംഗ് സൗകര്യം ലഭ്യമാണ്. ഹൈപ്പർലാപ്സ്, സ്ലോ മോഷൻ വീഡിയോ ഫീച്ചറുകൾ സോഫ്റ്റ്വെയർ അപ്ഡേറ്റിലൂടെ ഉടൻ ലഭ്യമാകും.
പുതിയ മോഡലുകളും നിറങ്ങളും
വേഫേറർ, സ്കൈലർ തുടങ്ങിയ ജനപ്രിയ മോഡലുകളിൽ ഗ്ലാസ് ലഭ്യമാണ്. ഷൈനി കോസ്മിക് ബ്ലൂ, മിസ്റ്റിക് വയലറ്റ് എന്നിവ ഉൾപ്പെടെ പുതിയ നിറങ്ങളിലും ഇത് ഉപഭോക്താക്കൾക്ക് ലഭ്യമാകും.
