റെനോ ഡസ്റ്റർ വീണ്ടും ഇന്ത്യയിൽ; പ്രീ-ബുക്കിങ് തുടങ്ങി

വിപണി പിടിക്കാൻ റെനോ ഡസ്റ്റർ വീണ്ടും; മാർച്ചിൽ വില പ്രഖ്യാപനം, പ്രീ-ബുക്കിങ് ആരംഭിച്ചു
ഇന്ത്യൻ വിപണിയിലേക്ക് ശക്തമായ തിരിച്ചുവരവിനൊരുങ്ങുകയാണ് റെനോ ഡസ്റ്റർ. 2012ൽ ആദ്യമായി അവതരിപ്പിച്ച ഡസ്റ്ററിന്റെ മൂന്നാം തലമുറ മോഡലാണ് ഇടവേളയ്ക്കുശേഷം ഇപ്പോൾ ഇന്ത്യയിൽ അവതരിപ്പിക്കുന്നത്. ആധുനിക ഡിസൈൻ, ശക്തമായ പവർട്രെയിൻ ഓപ്ഷനുകൾ, പുതിയ ഫീച്ചറുകൾ എന്നിവയുമായി 2026 റെനോ ഡസ്റ്റർ ഇന്ത്യൻ മിഡ്-സൈസ് എസ്യുവി വിപണിയിൽ വീണ്ടും സാന്നിധ്യം ഉറപ്പിക്കാനാണ് ലക്ഷ്യമിടുന്നത്.റെനോ ഡസ്റ്ററിന്റെ പ്രീ-ബുക്കിങ് 21,000 രൂപയ്ക്ക് ആരംഭിച്ചിട്ടുണ്ട്. ഔദ്യോഗിക വില പ്രഖ്യാപനം മാർച്ചിലായിരിക്കും.

എൻജിനുകളും പവർട്രെയിനുകളും

ഡസ്റ്ററിന് രണ്ട് ടർബോ പെട്രോൾ എൻജിൻ ഓപ്ഷനുകളും ഒരു സ്ട്രോങ് ഹൈബ്രിഡ് പവർട്രെയിനുമാണ് ലഭിക്കുക. 1.3 ലീറ്റർ ടർബോ പെട്രോൾ എൻജിൻ 163 എച്ച്പി കരുത്തും 280 എൻഎം ടോർക്കും ഉൽപ്പാദിപ്പിക്കും. ഇതിന് 6-സ്പീഡ് മാനുവൽ, 6-സ്പീഡ് ഡിസിടി ഗിയർബോക്സ് ഓപ്ഷനുകളുണ്ട്.1.0 ലീറ്റർ ടർബോ പെട്രോൾ എൻജിൻ 100 എച്ച്പി കരുത്തും 160 എൻഎം പരമാവധി ടോർക്കും നൽകും. ഈ എൻജിനിന് 6-സ്പീഡ് മാനുവൽ ഗിയർബോക്സ് മാത്രമായിരിക്കും ലഭിക്കുക.

സ്ട്രോങ് ഹൈബ്രിഡ് പവർട്രെയിൻ ഡസ്റ്ററിലുണ്ടാകുമെന്ന് റെനോ സ്ഥിരീകരിച്ചിട്ടുണ്ട്. 1.8 ലീറ്റർ 4-സിലിണ്ടർ പെട്രോൾ എൻജിൻ 109 എച്ച്പി കരുത്ത് നൽകും. ഇതോടൊപ്പം 49 എച്ച്പി ശേഷിയുള്ള ഇലക്ട്രിക് മോട്ടോർ, 1.4kWh (280V) ബാറ്ററി, 20 എച്ച്പി കരുത്തുള്ള ഹൈബ്രിഡ് സ്റ്റാർട്ടർ ജനറേറ്റർ എന്നിവയും ഉൾപ്പെടും. ഇതിലൂടെ ആകെ 160 എച്ച്പി കരുത്തും 172 എൻഎം ടോർക്കും ലഭിക്കും. ഹൈബ്രിഡ് ഡസ്റ്റർ ഈ വർഷം ദീപാവലിയോട് അടുപ്പിച്ച് പുറത്തിറങ്ങുമെന്നാണ് വിവരം.

എക്സ്റ്റീരിയർ ഡിസൈൻ

രാജ്യാന്തര വിപണിയിലെ മൂന്നാം തലമുറ ഡസ്റ്ററിനോട് സാമ്യമുള്ള ഡിസൈനാണ് ഇന്ത്യൻ പതിപ്പിനുമുള്ളത്. എന്നാൽ ഇന്ത്യൻ വിപണിക്ക് അനുയോജ്യമായ ചില മാറ്റങ്ങളും വരുത്തിയിട്ടുണ്ട്. പുതുക്കിയ ഹെഡ്ലാമ്പുകൾ, കണക്റ്റഡ് ടെയിൽലാമ്പുകൾ, പുതിയ എൽഇഡി ഡിആർഎല്ലുകൾ, ടേൺ ഇൻഡിക്കേറ്ററുകൾ എന്നിവയാണ് പ്രധാന ഹൈലൈറ്റുകൾ. ഗ്രില്ലിന്റെ മുകളിൽ വലുപ്പമുള്ള ‘ഡസ്റ്റർ’ ബാഡ്ജിംഗും നൽകിയിട്ടുണ്ട്.
വീൽ ആർക്കുകൾക്കും വാഹനത്തിന്റെ അടിഭാഗത്തിനുമൊട്ടാകെ കറുപ്പ് ക്ലാഡിംഗ് നൽകിയിട്ടുണ്ട്. സി-പില്ലറിലാണ് പിൻവശത്തെ ഡോർ ഹാൻഡിലുകൾ. കറുപ്പ് നിറത്തിലുള്ള റൂഫ് റെയിലുകൾക്ക് 50 കിലോഗ്രാം വരെ ഭാരമേറ്റെടുക്കാനാകും. 18 ഇഞ്ച് അലോയ് വീലുകളും 212 എംഎം ഗ്രൗണ്ട് ക്ലിയറൻസും ഡസ്റ്ററിന്റെ ഓഫ്-റോഡ് ശേഷി സൂചിപ്പിക്കുന്നു.

ഇന്റീരിയർ & ഫീച്ചറുകൾ

ഇന്ത്യൻ വിപണിക്കായി പ്രത്യേകമായി രൂപകൽപ്പന ചെയ്ത ഡാഷ്ബോർഡാണ് ഡസ്റ്ററിലുളളത്. 10.1 ഇഞ്ച് ടച്ച്സ്ക്രീനും 10.25 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്ററും അടങ്ങുന്ന ഡ്യുവൽ സ്ക്രീൻ സജ്ജീകരണമാണ് നൽകുന്നത്. ഫിസിക്കൽ ബട്ടണുകൾക്കും ഡിജിറ്റൽ കൺട്രോളുകൾക്കും തുല്യ പ്രാധാന്യം നൽകിയിട്ടുണ്ട്.
മുൻസീറ്റുകൾക്കിടയിലെ ആംറെസ്റ്റിൽ സ്റ്റോറേജ് കംപാർട്ട്മെന്റും പിന്നിലെ സെന്റർ ആംറെസ്റ്റിൽ രണ്ട് കപ്പ് ഹോൾഡറുകളും ലഭ്യമാണ്. 518 ലീറ്റർ ബൂട്ട് സ്പേസും ഡസ്റ്ററിന്റെ പ്രായോഗികത കൂട്ടുന്നു. പനോരമിക് സൺറൂഫ്, വയർലെസ് ഫോൺ ചാർജർ, ഡ്യുവൽ സോൺ ക്ലൈമറ്റ് കൺട്രോൾ, 6-വേ പവേഡ് വെന്റിലേറ്റഡ് മുൻസീറ്റുകൾ എന്നിവയാണ് മറ്റ് പ്രധാന സവിശേഷതകൾ.

സുരക്ഷ

എല്ലാ വേരിയന്റുകളിലും സ്റ്റാൻഡേർഡായി ആറു എയർബാഗുകൾ ലഭിക്കും. 360 ഡിഗ്രി ക്യാമറ, മുൻ–പിന്നിലെ പാർക്കിംഗ് സെൻസറുകൾ, ടയർ പ്രഷർ മോണിറ്ററിങ് സിസ്റ്റം, ലെവൽ 2 അഡാസ്, ഇലക്ട്രോണിക് പാർക്കിംഗ് ബ്രേക്ക്, എല്ലാ വീലുകളിലും ഡിസ്ക് ബ്രേക്കുകൾ തുടങ്ങിയ സുരക്ഷാ സംവിധാനങ്ങളും ഡസ്റ്ററിലുണ്ടാകും. ഇന്ത്യയിൽ അഡാസ് ഫീച്ചറുകളോടെ എത്തുന്ന റെനോയുടെ ആദ്യ മോഡലാണ് ഡസ്റ്റർ. 7 വർഷം / 1,50,000 കിലോമീറ്റർ സ്റ്റാൻഡേർഡ് വാറന്റിയും റെനോ നൽകുന്നുണ്ട്.

വില

റെനോ ഡസ്റ്ററിന്റെ പ്രീ-ബുക്കിങ് ആരംഭിച്ചുകഴിഞ്ഞു. മാർച്ചിലാണ് ഔദ്യോഗിക വില പ്രഖ്യാപിക്കുക. പ്രതീക്ഷിക്കുന്ന വില 10–12 ലക്ഷം രൂപ (എക്സ്-ഷോറൂം) വരെയാണ്. 2026 ഏപ്രിലിൽ ആദ്യ ഡസ്റ്റർ ഉപഭോക്താക്കൾക്ക് കൈമാറുമെന്ന് റെനോ അറിയിച്ചു.