ചില സിനിമകൾ അങ്ങനെയാണ്—റിലീസിന് മുൻപുണ്ടായിരുന്ന എല്ലാ മുൻവിധികളെയും അട്ടിമറിച്ച് ബോക്സ് ഓഫിസിൽ ചരിത്രം കുറിക്കും. അത്തരത്തിലൊരു സിനിമയായി മാറിയിരിക്കുകയാണ് രൺവീർ സിംഗ് നായകനായെത്തിയ ധുരന്ദർ. പേരിനെയും പ്രമേയത്തെയും ചുറ്റിപ്പറ്റിയ ട്രോളുകൾക്കിടയിൽ ചിത്രം പരാജയമാകും എന്നായിരുന്നു പലരുടെയും വിലയിരുത്തൽ. എന്നാൽ, ഒരിടവേളയ്ക്ക് ശേഷം ബോളിവുഡിന് 1000 കോടി ക്ലബ് സമ്മാനിച്ച സിനിമയായി ധുരന്ദർ മാറി.
ചിത്രം തിയറ്ററുകളിൽ എത്തിയിട്ട് ഒരു മാസം പിന്നിടുമ്പോൾ ആഗോള ബോക്സ് ഓഫിസ് കണക്കുകൾ പുറത്തുവന്നിരിക്കുകയാണ്. പ്രമുഖ ട്രാക്കിംഗ് സൈറ്റായ സാക്നിൽക്കിന്റെ റിപ്പോർട്ട് പ്രകാരം, 31 ദിവസത്തിനിടെ ധുരന്ദർ ആഗോളതലത്തിൽ നേടിയത് 1206.25 കോടി രൂപയാണ്. ഇന്ത്യയിൽ നെറ്റ് കളക്ഷൻ 772.25 കോടി രൂപയും, ഗ്രോസ് 926.75 കോടി രൂപയുമാണ്. വിദേശ വിപണികളിൽ നിന്ന് മാത്രം 280 കോടി രൂപയും ചിത്രം സ്വന്തമാക്കി. മുപ്പത്തിയൊന്നാം ദിനത്തിൽ മാത്രം 12.75 കോടി രൂപയാണ് ചിത്രം നേടിയത്.
2025 ഡിസംബർ 5നാണ് ധുരന്ദർ തിയറ്ററുകളിലെത്തിയത്. ആദ്യദിനം 28 കോടി രൂപയായിരുന്നു കളക്ഷൻ. തുടർന്നുള്ള ദിവസങ്ങളിൽ 32 കോടി, 43 കോടി എന്നിങ്ങനെ ഉയർന്ന ഗ്രാഫ് ചിത്രത്തിനുണ്ടായി. ആദ്യ ആഴ്ചയിൽ തന്നെ 207.25 കോടി രൂപ നേടിയ ചിത്രം, രണ്ടാം, മൂന്നും നാലും ആഴ്ചകളിലായി യഥാക്രമം 253.25 കോടി, 172 കോടി, 106.5 കോടി രൂപയും സ്വന്തമാക്കി.
ഇതോടെ, ഏറ്റവും കൂടുതൽ കളക്ഷൻ നേടിയ ഹിന്ദി സിനിമകളുടെ പട്ടികയിൽ ജവാൻയെ മറികടന്ന് ധുരന്ദർ രണ്ടാം സ്ഥാനത്തെത്തി. 2000 കോടിയിലധികം കളക്ഷൻ നേടിയ ആമിർ ഖാൻ ചിത്രം ദംഗൽ ആണ് ഇപ്പോഴും ഒന്നാം സ്ഥാനത്ത്. ആദിത്യ ധർ രചനയും സംവിധാനവും നിർവഹിച്ച ധുരന്ദർ അടുത്തിടെ ഒടിടി റിലീസിനും ഒരുങ്ങുന്നുവെന്ന റിപ്പോർട്ടുകളും പുറത്തുവരുന്നുണ്ട്.
